Saa ye win gɔɔ u turuku kua, Yesu u ka win bwãabu nnɛ gabu tɔna gari kua, bera Piɛɛ, Yakɔbu, Yohanu ka Andere. Saa ye Yesu u raa be yĩre te ta koo sɔ̃ɔsi ma u kon wãa mi sanam dãakim sɔɔ nɔɔsiamɔ, u bikia giribu gabu seeya u nɛɛ: “wara sãa yoo laakarigii wi u naanɛ mɔ. Wiya wi win yinni u win sɔm kowo be ba tie nɔmu sɔndia, u ka bu nɔɔri saa ye n weenɛ.” (Mateu 24:3, 45; Maaku 13:3, 4) “Yinni” win gari ba mɔ̀ mini Yesuwa. U win bwãabu nɔɔ mwɛɛru kuammɛ ba n yɛ̃ kam kam ma u koo gabu gɔsi bu ka be hunden dĩanu bɔnu kua dee dee sanam dãakim sɔɔ. Warà ba kon maa sãa “yoo” wi?

Be ba sawe Yesun bwãabu sɔɔ, ben wuuru piibuwa. “Yoo” wi, u sãawa Yehofan Seeda Diobun Sina Asakpɔru. Yesun bwãabun wuuru piibu gera, ga ra Yehofan são be ba tie hunden dĩanu wɛ̃ yen saa sɔɔ. “Yoo” naanɛgii wiya sa ra n mara u sun “dĩanu yabua saa ye n weenɛ.”—Luku 12:42.

“Yoo” wiya u Gusunɔn yigbɛru kpare (1 Timɔte 3:15) Yesu u “yoo” wi sɔm damgiru wɛ̃: u Yehofan yigbɛrun bɔnu ye ya wãa tem mini kpara. U ko n yigbɛrun bɔnu yen sɔm yãnun nɔni do, u waasu kobun sɔmburu kpara, kpa u sun sɔ̃ɔsinu wɛ̃ saa bɛsɛn yigbɛ piibinun di. U ka sun ye n weenɛ wɛ̃, saa ye sɔɔ sa yen bukata mɔ, “yoo” naanɛgii ka laakarigii ra n sun hunden dĩanu bɔnu kuammɛ, tire ni sa ra n loo mɔ̀ waasu sɔɔn di, ka maa bɛsɛn mɛnnɔsun kpunaa kpuro sɔɔn di.

“Yoo” wi, u sãa naanɛgii Bibelin gem ka maa labaari gea ye ba wi yiire u kpara sɔɔ. Bwisi ye u maa ka gãa ni nu sãa Kirisiginu nɔni doke tem sɔɔ, ya sɔ̃ɔsimɔ ma u sãa laakarigii. (Gɔrobun kookoosu 10:42) Yehofa u maa “yoo” wi domaru kuammɛ, ma tɔmbu ba dabiamɔ ba sosimɔ win yigbɛru sɔɔ, ma hunden dĩa ni nu yibu n sosimɔ.—Esai 60:22; 65:13.

• Warà Yesu gɔsa u win bwãabu hunden dĩanu yabua?

• Mban sɔ̃na sa ko kpĩ su nɛɛ “yoo” wi, u sãa naanɛgii ka laakarigii?