La ndekah kenca kematenna, Jesus ercakap-cakap ras empat ajar-ajarna​—Petrus, Jakup, Johanes, ras Andreas. Paksa ernubuat kerna tanda kerehenna i bas wari-wari si pendungi, Jesus mereken sada penungkunen si penting, ”Adi bage, ise dage juak-juak si tutus dingen pentar? Ia me si ipercayaken tuanna jadi kepala juak-juak si deban guna mbagiken pangan man juak-juak e i bas paksana.” (Matius 24:3, 45; Markus 13:3, 4) Jesus mpetangkasken man ajar-ajarna maka selaku ’tuan’ kalak e, itetapkenna pagi kalak si terus nikapken pangan rohani man pengikut-pengikutna i bas paksa kedungen jaman. Ise nge maksudna juak-juak e?

Juak-juak enda eme sada terpuk kitik pengikut Jesus si iminaki alu kesah si badia. ”Juak-juak” enda itandai selaku Badan Pinpinen Saksi-Saksi Jahwe. Juak-juak enda nikapken pangan rohani i bas paksana man kalak si radu nembah Jahwe. Kami ernalem kempak juak-juak si pentar enda gelahna terus ndatken ’persedian pangan i bas paksana’.​—Lukas 12:42.

Juak-juak enda ngurus keluarga Dibata. (1 Timotius 3:15) Jesus mereken tanggung jawab si mbelin kempak juak-juak enda guna ngurus pendahin organisasi Jahwe i doni​—ngurus kerina erta materi, ngaturkan dahin erberita, ras ngajari kami i bas runggun. Jadi, guna nikapken kai si iperluken kami i bas paksana, ”juak-juak si tutus dingen pentar” mbagiken pangan rohani alu buku-buku si igunaken kami i bas pelayanen, janah arah pengajaren si ipeseh i bas perpulungen ras kebaktin.

Juak-juak enda tutus kempak kebenaren Pustaka si Badia ras dahin mberitaken berita si meriah, janah pentar i bas ngurus dingen ngelakoken dahin si ibereken Kristus i doni. (Perbahanen Rasul-Rasul 10:42) Dibata Jahwe masu-masu pendahin kalak e alu nambahken jumlah anggota runggun ras mereken pangan rohani alu simpar.​—Jesaya 60:22; 65:13.

• Ise nge si itetapken Jesus guna mereken pangan rohani man ajar-ajarna?

• Engkai maka juak-juak enda ikataken tutus dingen pentar?