Amykon kurita tyrombyry uwaporo, Jesus tyworupa tywaije man okupa’en typyitorykon maroine — Petrus, Jakobus, Johanes, Andreas enapa. Moro ‘tywopyry man kurita’ poko torupa iwaine man, morokon irokonymbo kurita otykon wokapyry man jako, irombo te amy potosu aturupono poko tywoturupo man : « Nokypan pyitonano ko iroke tamyikapore, tupu’pone imero nan, mo’ko ijopotory’wa ytome mo’karon a’sakarykon epo, upatokome i’wa arepa tunda’po mero ? » (Mateus 24:3, 45 ; Markus 13:3, 4). Moro « arepa » pato ero po, ukutyry man o’win a’kanano tano arepa me iwairy, moro iporono ukutyry Tamusi poko. Mo’ko « Jopoto » Jesus typyitorykon waine tyka’pome man, mo’karon poto me imero oty ukuponamon andymory ty’wa moro imatyry jururu tundary mero. Noky ko mose « pyitonano » me naitan ?

Amykon epekady’san kresten apyimy moro man. « Epekady’san » tauropo moro man Tamusi a’kary wa tapekase mandon. Mo’se « pyitonano » amykon Jehowah Ekary Aroponamon wokyryjan apyimy moro man. Moro a’kanano tano arepa ke amykonymbo Jehowah ety awonganamon upaton. Mo’ko tuponaka ro kytoposaton, moro « a’kanano tano kareparykon apyitome moro juru tundapo mero » (Lukas 12:42).

Moro « Tamusi auty » enejan (1 Timoteus 3:15). Jesus mose « pyitonano » wa moro poto’su a’wosimban amaminanon kapyry enery tyje man, ero nono tupono Jehowah na’nanopy’san wanome. Moro a’nanopy’san otyrykon, ipyratarykon enejan, moro oka emami undymanon, kamepadon Tamusi na’nanopy’san ranaine. Morokon kynamonopyrykon ytome, moro juru ta, mo’ko « tamyikapore tupu’pone pyitonano » moro a’kanano tano arepa ekajan morokon kareta pato, morokon akujan ro na’na oka ekarotome, morokon omepano ineneposan a’tananono jako, morokon potonon a’tananono jako enapa.

Mose « pyitonano » « tamyikapore » man morokon iporonokon Tamusi karetary tanokon wa, moro iru’pyn oka ekarory wa enapa, « tupu’pone » enapa man morokon nono tuponokon Kristus otyrykon, undymary poko (Apojoma’san 10:42). Jehowah kurano yjan i’wa apyimangapory ta, potome imero a’kanano tano arepa yry ta enapa (Jesaja 60:22 ; 65:13).

• Noky ko tyje nan Jesus wa moro a’kanano tano arepa ytome mo’karon typyitorykon waine ?

• Otonome kykarykon taro kytaton mo’ko « pyitonano » « tamyikapore » man « tupu’pone » enapa ?