Aka ber tsiabaa bi ma Jesus ewu no, ɔnye n’esuafo no mu baanan twetwẽe nsumaa mu nkɔmbɔ bi. Esuafo no nye; Peter, James, John nye Andrew. Aber a nna Jesus rekã ne mbae wɔ ewiei mber mu no ho asɛnkyerɛdze ho asɛm no, obisaa asɛm a no ho hia yi dɛ; “Woana mbɔ nye akowaa nokwafo nye nyansafo a no wura dze no esi ne fikuw do, dɛ ɔmma hɔn edziban wɔ ber a ɔsɛ mu?” (Matthew 24:3, 45; Mark 13:3, 4) Nna Jesus rema n’esuafo no awerɛhyɛmu dɛ, dɛ hɔn “wura” no, ɔbɛpaw nkorɔfo a wɔbɛma n’ekyirdzifo no sunsum afamu edziban a ɔfata, kyerɛ dɛ Nyankopɔn ho nokwar nyimdzee aber nyina wɔ ewiei ber no mu. Woananom na wɔbɛkã abɔ mu ayɛ akowaa yi?

Ɔyɛ Jesus n’ekyirdzifo a wɔdze sunsum asera hɔn no mu kuw ketseaba bi. “Akowaa” yi yɛ kuw ketseaba bi a wɔyɛ mbarimba a wɔasera hɔn, na hɔn na wɔkã bɔ mu yɛ Jehovah Adasefo Akwankyerɛ Kuw no. Ɔma ne mfɛfo a wɔyɛ Jehovah asomfo no sunsum afamu edziban wɔ ne ber mu. Yɛdze hɛnho to dɛm akowaa nokwafo yi do dɛ ɔbɛma hɛn ‘edziban a ɔyɛ hɛn kyɛpɛn wɔ ber a ɔsɛ mu.’​—Luke 12:42.

Ɔhwɛ Nyankopɔn fie no do. (1 Timothy 3:15) Jesus dze asodzi a no mu yɛ dur hyɛɛ akowaa no nsa dɛ ɔnhwɛ edwuma a Jehovah ahyehyɛdze no ne fã a ɔwɔ asaase do no reyɛ no do. Ɔno na ɔhwɛ ndzɛmba a hɛn ahyehyɛdze no wɔ no do, ɔkyerɛ asɛnka edwuma no kwan, na ɔnam hɛn asafo ahorow no do kyerɛkyerɛ hɛn. Ntsi mbrɛ ɔbɛyɛ ma “akowaa nokwafo nye nyansafo” yi ama hɛn dza yehia wɔ ber a ɔsɛ mu no, ɔnam nwoma nye dza ɔkã ho ahorow a yɛdze yɛ asɛnka edwuma no, nye dwumadzi ahorow a ɔkɔ do wɔ hɛn nhyiamu nye ehyiadzi ahorow ase no do ma hɛn nsa kã sunsum afamu edziban.

Akowaa no yɛ nokwafo wɔ Bible mu nokwar a ɔkyerɛkyerɛ nye ahyɛdze a ɔnye dɛ ondzi asɛmpa no ho dase a odzi do no mu. Bio so, ɔyɛ nyansafo wɔ mbrɛ ofi nyansa mu hwɛ Christ egyapadze a ɔwɔ asaase do no mu. (Ndwuma 10:42) Jehovah rihyira edwuma a akowaa no reyɛ no do ma nyimpa pii aba asafo no mu, na ɔama yenya sunsum afamu edziban pii.​—Isaiah 60:22; 65:13.

• Woana na Jesus paaw no dɛ ɔmma n’esuafo sunsum afamu edziban?

• Ebɛn kwan do na akowaa no yɛ nokwafo nye nyansafo?