Zesu haa lowai ə lɛɛ tɔwɔ, da ŋɔ kalan nea taɠaa di lono kɛ, diɛ ɓaa : Piɛli, Zaakə, Záán ə lɛɛ Andəle. Zesu ə gɛ mɛni a tɔɔmun yələkɔlɔn ɉu kɔlɔn ɉɛn lɛ diɛ. Mɛniɠaa tii ə ɉukulɔ diɛ, di laa a hwɛɛ kɛ yɛnɛɛ ŋaakpɛɛ lowai. Yili pulu ə di maaləngɛ yɛ diɛ : ‘ Kóló kɛ mun nɛlɛ ɓə dəlimoɔ, kili yɛ ɓo ma ʼ, yii ŋɔ mɛni namu aa ɉee ŋɔ nu kpului ɲɛi tɔwɔ yɛ kɔnɔn dɛɛ di pɔ a dɛɛ lowai ? (Matie 24:3, 45 ; Malikə 13:3, 4). Gɔnɔn tii ɓaa Yálá lawoo. Zesu ɓə gaa a ‘ mɛni namu ʼ. Ə mo yɛ ma gaa pai kɛ nu kpulu ta həɠəi ɉu, yiliɠaa diɛ ŋɔ kalan neai kɔnɔn gɛ a Yálá lawoo yɛnɛɛ ŋaakpɛɛ lowai. Gbɛɛ ɓə kɛi pa kɛi a góló kɛ mun tii ?

Kilistalea maatiɛɠaa tii kaa a nu kpulu logolo. Nu ‘ maatiɛ ʼ ɓaa nu yii Yálá ŋɔ kili maahəɠɛɛ aa ɉəɠə ɉu. ‘ Góló kɛ mun ʼ tii ɓaa a Zehova ŋɔ Kəlaɠaa Ɲɛi tɔwɔ nua, a kɔnɔn dɛɛ Yálá ŋɔ nu kpului pɔ “ a dɛɛ lowai. ” Yili ɓa, ya ɓə ku kaa ɲəi kɔnɔn ɉɔlɔɓo mɛni ɓa. — Lukə 12:42.

Góló kɛ mun tii a Yálá ŋɔ nu kpului maa mɛni ɲɛi kulɔ. (Timɔtə dɔlɔɔ 3:15.) Zehova ŋɔ kpɔn bələ tɔnɔ kaa lɔi mɛi. Zesu ə gbɔn tii ŋɔ kólóɠaa kɛ mɛni gbɔu laa góló kɛ mun tii nwuɔ. Gólóɠaa tii ɓaa : Yálá lawoo laa həliɛ da kalan gɛɛ galangbɔnŋaa hu. ‘ Kóló kɛ mun dəlimoɔ, kili yɛ ɓo ma ʼ a ku kɔnɔn dɛɛ ku pɔ ɓɛlowai maakpaan a kɛ la kuɔ. A gɛ a hɛɓɛ yiliɠaa. Kwa daɠaa həɠə kuɔ Yálá lawoo laa həli la. A gɛ nwɔnɔ a kalanwooɠaa yii kwa mɛn ku wɔ ŋaakpɔn gɛ pɛlɛɠaa mu da ku wɔ ŋaakpɔn gbea-kpea diɛ.

Góló kɛ mun tii təlimoɔi Biblə ŋɔ teɲa wooɠaa diɛ da wɛlɛɛ lɛlɛɛ laa həli mɛni. Yili pulu kili kaa ma yii hwilɛn na ɲɛi kɛ mɛni ɓa Kilista yəi hɛnŋaa diɛ lɔi mɛi (Túwɔ́ pələ 10:42). Zehova ŋɔ kpɔn a kɛnɛ góló kɛ mun tii haalai. Yili ɓa, Zehova a lúwɔ́ too ma, maahɔlɔɓo a kɔnɔn ɉɔlɔɓo kɛnɛ yɛ dɛɛ Yálá ŋɔ nu kpului pɔ. — Izai 60:22 ; 65:13.

• Gbɛɛ ɓə Zesu ə gɛ a ŋɔ kalan neai kɔnɔn gɛ mun ?

• Góló kɛ mun tii Zesu ə vaaɓo lə mɛni ɓa gwa kɛ ma dəlimoɔi ə lɛɛ kili yɛ ɓo ma ?