Süpülapünaa naapajiraain nikii Jesuu, yootushi nia nümaa Pedro, Santiago, Juan otta Andrés. Wanaa sümaa naashajaain süchiki tü shiyaawaseinjatkat nükalia, müshi nia: «¿Jarai maʼin chi achepchiee oonookai otta kekiikai maʼin, eʼitaanakai nutuma chi nülaamainkai süpüla naapüin tü eküütkat wanaapünaa sümaa tü kaʼi choʼujaakalü oʼu namüin na nüchepchiakana?» (Mateo 24:3, 45, TNM; Marcos 13:3, 4). Tü nüküjeekalü achiki Jesuu wanaa sümaa nümüin «chi achepchiee oonookai otta kekiikai maʼin», shia naashajaaka achiki niʼitaainjanain waneeinnua wayuu aapüinjanaka waneepia tü choʼujaakat sümüin nanoula na nikirajüinkana sülüʼütpa süpüla sajaʼttüin tü kasakalüirua. ¿Jaralii naya?

Naya na palitchon wayuu nümaajanakana Jesuu, aneekünakana nüka chi naaʼinkai Maleiwa. Chi «achepchieekai», naya na anoujüshii chainjanakana iipünaa, na Laülaashii Jülüjakana Aaʼin na Aküjüliikana Pütchi sainküin Mma. Naapüin namüin na anoujüshiikana nünain Jeʼwaa tü kasa anainjatkalü atuma nanoula wanaa maʼin choʼujaain shia namüin (Lucas 12:42, TNM).

Laülaashi nia saaʼu tü kasa nümaʼanakat Maleiwa. (1 Timoteo 3:15). Niʼitaain Jesuu najapuluʼu chi achepchieekai tü kasa sünainpünaakat nupueulose Jeʼwaa. Maʼaka saaʼin tü korolokot, tü aküjaakat pütchi jee tü kasa ekirajünakalü anain waya eere woutkajaain. Süpüla naapüin «chi achepchiee oonookai otta kekiikai maʼin» tü kasa choʼujaakat wamüin wanaapünaa sümaa tü kaʼi choʼujaakalü oʼu shia, naapüin wamüin tü karaloukta waküjüinjatkalü aka pütchi otta ekirajünüshii waya suluʼu tü Piichi Outkajaaleekat jee sünain tü outkajawaakat miyoʼu.

Oonooshi chi achepchieekai sümaa tü shikirajakalü anain tü Wiwüliakat otta naainjüin tü aluwataanakalü anain nia: tü aküjaakat pütchi. Kekiishi maʼin nia sünain aaʼinmajaa süpüshuaʼa tü kasa niʼitaakat Jesuu najapuluʼu (Aluwataaushikana 10:42). Anasü sukuwaʼipa niʼyataain nutuma Jeʼwaa süka kooʼomüin na aküjüliikana pütchi otta wainmain tü kasa akaaliinjakat waya süpüla anain wanoula (Isaías 60:22; 65:13).

• ¿Jarai niʼitaaka Jesuu sünain aapaa tü choʼujaakat sümüin wanoula?

• ¿Jamaluʼulu noonooin otta kekiin maʼin «chi achepchieekai»?