CAGILI 19
Ŋme n tie yaa “naacendugika n pia mi yanfuoma”?
Ti kuli baadi li dandanli jiema ŋama
Jesu kuuma n den nagidi yeni, dayenli o den boe leni o ŋoadikaaba Pieli, Jaka, Jan leni Andile. O waani-ba yaa “sinankeene” n baa waani o cuama ki go buali-ba: “Ŋme n tie yaa naacendugika n pia mi yanfuoma ke o canbaa guuni o niba ke wan yaa tendi ba mi jiema li yogunu yaa pundi?”. (Matie 24:3, 45; Marki 13:3, 4) Mi jiema naa den tie moamoani jiema ba, li tie li dandanli jiema, yaala n tie U Tienu bangima. O den bua o ŋoadikaaba n bandi ke mi juodima dana nni, bi “canbaa” Jesu den ba gandi yaaba n baa teni-ba laa bangima yogunu kuli. Ŋme n den baa tua o naacemo?
Bi taani tie kilisiti nigagidikaaba. Nigagidika tie U Tienu fuoma n gandi yua. Laa naacenmo tie Jeova Siedinba gobiditaanli liiga yaaba cagili. Bi tendi li dandanli jiema Jeova niba po. Bani n ye yeni, n todi, ke ti baadi ‘yaa jiema n bili tipo ya yogunu’.—Luki 12:42.
Bi kubi “U Tienu Diegu”. (Timote Tikpiali 3:15) Jesu den yedi laa naacemo n kubi o gobiditaanli yaala n ye ki tinga nni, ki diidi o tuona n cuoni maanma: U laabaaliŋamo kpaanma tuonli leni li nitaanli bangima tuonli. Bi bua tin ba li dandanli jiema tin bua maanma leni yaa yogunu n dagidi tipo. O naacendugika n pia mi yanfuoma yeni, puuni-ti laa jiema yaa tila, ke ti kubi kpaandi yeni niini. Laa jiema go ye tin baadi yaa bangima ti taana leni ti taancianma nni.
Laa “naacemo” tie “dugika” kelima o wangi biibili n yedi yaala cain, ki go cedi ke bi kpaandi u laabaaliŋamo nani biibili n li yedi maanma. Wan kubi Kilisiti piama ki tinga nni maanma wangi ke o pia “mi yanfuoma”. (Jesu Tondiba Tuona 10:42) Jeova tiendi-ba ŋalibalika cianli kelima, bi niba li pugidi ti gobiditaanli nni. Ban tiendi yaa tuonli li dandanli papaali po moko caa liiga.—Esayi 60:22; 65:13.
-
Jesu gandi ŋme ki baa teni o ŋoadikaaba li dandanli jiema?
-
Bee n cedi ke laa naacenmo tie dugika ki go pia mi yanfuoma?