Oruveze orusupi komurungu wonḓiro ye, Jesus wa ri nehungi ku novahongewa ve vane,​—Petrus, Jakobus, Johanes na Andreas. Eye aa hungire ohunga notjiraisiro tjomeero we momayuva omasenina, ne ve pura epuriro ndi: “Omukarere omuṱakame nomunazondunge hapo ouṋe? Eye ngwi omuhona we ngwe mu zika kombanda yovakarere ovakwao kutja e ve pe ovikurya moruveze ndwa tuwa po.” (Mateus 24:3, 45; Markus 13:3, 4) Jesus aa kwizikire ovahongewa ve kutja ‘otjomuhona’ wawo, ma ziki imba mbu mave kahandjaura ovikurya vyombepo mbya yenene kovakarere ve moruveze rwomaandero wouye. Owaṋi ngu ma rire omukarere omuṱakame nomunazondunge?

Owo ovakongorere vaJesus vatjiri mba twirisiwa nombepo ondjapuke. “Omukarere” ngwi, onguri Orutu Orunane rwOvahongonone vaJehova. Eye u yandja ovikurya vyombepo moruveze ndu ri rwo kovakarere ovakwao vaJehova. Eṱe tu hepa “ovikurya” omukarere omuṱakame ngwi mbye tu pa aruhe “moruveze ndwa tuwa po.”​—Lukas 12:42.

Owo ve ṱakamisa onganda yaMukuru, ndji ri ombongo ye. (1 Timoteus 3:15) Jesus wa yandja omerizirira omanene komukarere we wokuhongorera oviungura vyotjira tjaJehova tjokombanda yehi. Oviungura mbi, mavi kamburire mo okuṱakamisa ouini wotjira tjaJehova, nokuhongorera oviungura vyokuzuvarisa nokutuhonga mozombongo. Kunao, kokutja tu pewe ovikurya mbi tu hepa moruveze ndu ri rwo, “omukarere omuṱakame nomunazondunge” u yandja ovikurya vyombepo okupitira momambo ngu tu ungurisa mokuzuvarisa, na wina momahungi nge yandjwa pozombongarero zombongo na pomaworonganeno wetu omanene.

Omukarere ngwi, omuṱakame kouatjiri wOmbeibela nomarakiza wayo wokuzuvarisa ombuze ombwa, neye omunazondunge momuano mbwe kayendisa ozonḓero zaKristus kombanda yehi nounongo. (Oviungura 10:42) Jehova u vatera omukarere omuṱakame nomunazondunge kutja ma yenene okuhandjaura ovikurya ovingi vyombepo.​—Jesaja 60:22; 65:13.

• Jesus wa zika uṋe okuyandja ovikurya vyombepo kovemukongorere?

• Omomiano viṋe omukarere ngwi me ri omuṱakame nomunazondunge?