Sebedau pemati iya, Jesus bisi berandau enggau 4 iku murid iya—Peter, James, John enggau Andrew. Lebuh Jesus madahka tanda penatai iya ba pengujung dunya, iya mansutka siti tanya ti beguna bendar: “Nya alai, sapa ulun ke tetap ati sereta bepenemu-dalam, ke udah diasuh tuan iya ngemataka semua ulun ti bukai, ngambika bisi meri sida pemakai ba maya ti patut.” (Matthew 24:3, 45; Mark 13:3, 4) Ketegal Jesus nya “tuan” sida, iya besemaya ngagai bala murid iya deka milih orang ke nyediaka pemakai beroh enggau tetap ngagai bala murid iya ba pengujung dunya. Sapa orang ke deka dipilih nyadi “ulun” tu?

Sida tu seraban mit murid Jesus ke diiri ngena roh kudus. “Ulun” tu dikumbai Raban ti Ngiring Saksi-Saksi Jehovah. Sida nyediaka pemakai beroh ba maya ti patut ngagai orang ke nyembah Jehovah. Kitai ngandalka ulun ke tetap ati tu meri kitai “pemakai ba maya ti patut.”—Luke 12:42.

Sida nyaga eklisia Petara. (1 Timoti 3:15) Jesus meri tanggung pengawa ti berat ngagai bala ulun tu iya nya nyaga pengawa gerempung Jehovah ba dunya tu—nyaga reta, ngatur pengawa injil, enggau ngajar kitai nengah eklisia kitai. Nya alai, kena nyediaka utai ke diguna kitai ba maya ti patut, “ulun ke tetap ati sereta bepenemu-dalam” meri pemakai beroh ngena litaricha ke dikena kitai ba pengawa nginjil, nyengkaum program ke diatur ba gempuru eklisia enggau ba gempuru besai.

Ulun tu tetap ati ke pemendar ari Bup Kudus sereta pesan ke ngasuh ngerembaika berita manah, lalu sida bepenemu-dalam pasal nyaga reta Jesus ba dunya tu. (Kereja Rasul 10:42) Jehovah merekat pengawa sida enggau mayuh pemansang sereta pemakai beroh ti belimpah.—Isaiah 60:22; 65:13.

• Sapa ke dipilih Jesus kena meri pemakai beroh ngagai bala murid iya?

• Nama nunjukka ulun tu tetap ati sereta bepenemu-dalam?