Ọkuẹsẹ Jesu yu, ọle da nin itue enẹn bhi edibo nesọle do ikolo, ele hi—Pita, Jemisi, Jọni, bi Andru. Ẹghe nin, Jesu rẹ ha kha akhasẹ ọsi ẹghe ọkike bhi ọnin agbọn nan. Ọda nọọn ọta kpataki: ‘Họ bhọ ọnin ọguọmhandia nọn wanlan nan gba ẹkẹ ọle nin ebealẹn ọlẹn mun ugbẹloghe ọsi uwa nọnsọle rebhe nan, nọn ha ri ebale nele bhi ẹghe nọn khẹke?’ (Matthew 24:3, 45; Mark 13:3, 4) Ranmhude ọle hi ebealẹn nọnsele, Jesu da taman edibo nesọle ghe, ọle dẹ zi eria ne ha re ebale oriọn nele bhi ẹghe nọn khẹke bhi ẹghe ọkike ọsi ọnin agbọn nan. He bhọ ha ribhi usun enin ọguọmhandia nan?

Ikpeta bhi ẹwẹ enin Jesu ri ahu ẹlimhin nọn khiale zẹ. Ọnin ‘ọguọmhandia’ nan, ọle a lẹn ọbhi Otu Ne Sun Oga ọsi Esali Jehova. Ele ri ebale oriọn bhi ẹghe nọn khẹke nin ene ga iJehova. Mhan mun udu nyan ọnin ọguọmhandia nan, nọn ha ri ‘ebale oriọn mhan bhi ẹghe nọn khẹke.’—Luke 12:42.

Ọgbẹloghe azagba-uwa nọnsi Osẹnobulua. (1 Timothy 3:15) Jesu mun iwẹnna kpataki nin ọnin ọguọmhandia nan nọn rẹ ha gbẹloghe agbotu nọnsi Jehova bhi ọnin otọ nan—nọn rẹ ha gbẹloghe emhin nan noo bhi agbotu, nọn rẹ ha sun iwẹnna itẹmhọn Osẹnobulua bi nọn rẹ ha man mhan emhin bhi agbotu. Bhiriọ, nọnle da sabọ ha re ebi mhan guanọ mhan bhi ẹghe nọn khẹke, ọnin ọguọmhandia nan gba ẹkẹ ọle nan, gbẹn ebe kikẹ, mhanmhan ikolo oga bi usikoko, nọnle rẹ re ebale oriọn mhan, nọn rẹkpa mhan bhi iwẹnna itẹmhọn Osẹnobulua.

Ọguọmhandia nan gba ẹkẹ ọle gene khọnan, ranmhude ọle re obọ rẹkhan ẹmhọn-ata nọn ribhi ẹkẹ iBaibo bi uhi nan gbẹn ọbhọ, nanrẹ ha tẹmhọn Osẹnobulua. Ọle wanlanmhin ranmhude, ọle gbẹloghe uku nọnsi Jesu bhi ọnin otọ nan. (Acts 10:42) IJehova nan erọnmhọn nin iwẹnna oga nọnsọle nọn rẹ ha tuẹn ọkhun.—Isaiah 60:22; 65:13.

• Họ bhọ Jesu zẹle nọn ha ri ebale oriọn nin edibo nesọle?

• Uwedẹ nela ọnin ọguọmhandia nan rẹ yi ọnan gba ẹkẹ ọle bi ọnọn wanlan?