Yesu gaw shi si na nhtoi ni wa ai aten hta Petru, Yaku, Yawhan, Andre ni hpe laksan ga shaga ai. Shi bai du na jahtum nhtoi a lamik kumla hte seng nna, shi ndai hku tau hkrau tsun ai: “Madu gaw shi a nta masha ni a ntsa e san tawn da nna, aten du jang shanhte hpe lu sha karan jaw lu na, sadi ai hte myit su ai mayam gaw, kadai wa rai nga a ta?” (Mahte 24:3, 45; Marku 13:3, 4) “Madu” re ai Yesu gaw, shi a sape ni hpe jahtum nhtoi laman hta, wenyi shat hpe ayan jaw sha na matu, mayam ngu ai hpung langai hpe, aya tang da na ngu ga sadi jaw ai. Ndai mayam hta kadai ni lawm a ta?

Shanhte gaw, namman chya hkrum ai Yesu a sape ni re. Dai “mayam” gaw namman chya hkrum ai hpunau nkau mi hte uhpung kaji langai hku nna hpawng de da ai Yehowa Sakse ni a Uphkang Hpung re. Shanhte gaw Yehowa hpe nawku ai ni hpe ten du wenyi lu sha jaw nga ai. Anhte gaw “aten du lu sha karan jaw” ai ndai sadi dung ai mayam hpe kamhpa nga ma ai.​—⁠Luka 12:42.

Shanhte gaw Karai Kasang a nta hpe hkang ya ai. (1 Timohti 3:15) Yesu gaw dai mayam hpe, Yehowa a uhpung uhpawng a ginding aga hte seng ai uhpung uhpawng hpe hkang na lit kaba hpe ap da ai. Dai hta manu dan sutgan ni, hkaw tsun bungli hpe lam matsun ai lam ni, hpung hku nna sharin achyin ya ai lam ni lawm ai. Anhte hta ra ai lam hpe ten du madi shadaw ya na matu, ‘Sadi dung ai hte myit su ai mayam’ gaw laili laika ni, hpung zuphpawng ni hte zuphpawng kaba lamang ni kaw na wenyi shat hpe garan jaw nga ai.

Ndai mayam gaw Chyum Laika a teng man ai lam hte, shanhte lu da ai hkaw tsun bungli lit ntsa sadi dung nna, ginding aga ntsa na Yesu a sutgan ni hpe lanu lahku ai hta myit su ma ai. (Kasa 10:42) Yehowa gaw masha law law hpe shi a sakse byin hkra galaw nga ai. Sadi dung ai hte myitsu ai mayam hku nna shanhte hpe wenyi shat nhpaw n-ya ndaw nhta hkyen lajang ya nga ai.​—⁠Esaia 60:22; 65:13.

• Yesu gaw shi a sape ni hpe ten du lu sha jaw sha na matu kadai hpe aya tang da a ta?

• Mayam gaw gara hku sadi dung nna myit su ai kun?