Ĩvinda ĩkuvĩ atanamba kũkw’a, Yesũ nĩwaendie nzama na ana katĩ wa amanyĩw’a make​—⁠Vetelo, Yakovo, Yoana, na Andalea. Ayathana ĩũlũ wa wonany’o wa kwĩthĩwa vo kwake mĩthenyanĩ ya mũminũkĩlyo, Yesũ nĩwakũlilye ĩkũlyo yĩĩ ya vata: “Nũũ ĩndĩ ngombo ndĩkĩĩku na mbũĩ ĩla vwana wayo wamĩiie ĩũngamĩe nyũmba yake, nĩ kana ĩmanenge lĩu woo ĩvinda yĩla yaĩle?” (Mathayo 24:3, 45, NW; Maliko 13:3, 4) Yesũ aĩkĩĩthasya amanyĩw’a make kana e “vwana” woo, aĩ anyuve ala maĩ manenge aatĩĩi make lĩu wa kĩveva matekũtĩĩa ĩvindanĩ ya mũminũkĩlyo. Naaũ maĩ methĩwe ngombo ĩsu?

Nĩ kĩkundi kĩnini kya aatĩĩi ma Yesũ ala nĩ etĩkĩw’a mauta. “Ngombo” ĩsu nĩ Nzama Ĩla Ĩtongoesye ya Ngũsĩ sya Yeova na ĩnengae athaithi ala angĩ ma Yeova lĩu wa kĩ-veva ĩvinda yĩla yaĩle. Twĩthĩawa twĩkwetye ngombo ĩsu ndĩkĩĩku ĩendee kũtũnenga ‘lĩu ĩvinda yaw’o.’​—Luka 12:42.

Ĩũngamĩaa nyũmba ya Ngai. (1 Timotheo 3:15) Yesũ nĩwanengie ngombo ĩsu kĩanda kĩito kya kũũngamĩa wĩa nthĩnĩ wa kĩlungu kya kũũ nthĩ kya ũseũvyo wa Yeova. Kĩanda kĩu nĩ kũsũvĩa malĩ ya ũseũvyo ũsu, kũũngamĩa wĩa wa kũtavany’a, na kũtũmanyĩsya kwĩsĩla ikundinĩ situ. Kwoou, nĩ kana ĩtũnenge kĩla twĩ na vata nakyo ĩvinda yĩla yaĩle, “ngombo ndĩkĩĩku na mbũĩ” ĩendee kũnyaĩĩkya lĩu wa kĩveva kwĩsĩla mavuku na tũvuku tũla tũtũmĩaa ũtavany’anĩ, na maũvoo ala maumaw’a maũmbanonĩ maitũ ma kĩkundi na maũmbanonĩ maitũ manene.

Ngombo ĩsu nĩ ndĩkĩĩku nthĩnĩ wa kũatĩĩa ũw’o wa Mbivilia na kwĩanĩsya wĩa wayo wa kũtavany’a ũvoo mũseo, na nĩ mbũĩ nthĩnĩ wa ũndũ ĩsũvĩaa kwa ũĩ maũndũ ma Klĩsto ĩũlũ wa nthĩ. (Meko ma Atũmwa 10:42) Yeova aendee kũathima wĩa wa ngombo ĩsu kwa kũkusya andũ angĩ aingĩ methĩwe ngũsĩ syake na kwa kũmĩtetheesya yumye lĩu mwingĩ wa kĩveva.​—Isaia 60:22; 65:13

• Nũũ ũla wanyuviwe nĩ Yesũ aĩthye amanyĩw’a make kĩveva?

• Ngombo ĩsu yĩthĩawa yĩ ndĩkĩĩku na yĩ mbũĩ kwa nzĩa syĩva?