Okafimbo kaxupi fimbo Jesus ina fya, okwa li a pula epulo la fimana eshi a li novahongwa vaye vane, Petrus, Jakob, Johannes naAndreas, eshi a li ta kundafana navo kombinga yedidiliko lokukala po kwaye nolomafiku axuuninwa. Okwa li a pula a ti: “Olyelye hano omupiya omudiinini nomunaendunge, omwene waye e mu tula kombada yovapiya vaye, e va pe oikulya pefimbo [layo]?” (Mateus 24:3, 45; Markus 13:3, 4) Jesus okwa li ta shilipaleke ovahongwa vaye kutya e li “omwene” wavo, okwa li ta ka nangeka po ovo tava ka kala tava yandje alushe eendja dopamhepo kovashikuli vaye pefimbo lexulilo. Mbela oolyelye va li tava ka kala omupiya?

Omupiya oo okwa fikama po movashikuli vaJesus vashili ovavaekwa. “Omupiya” oha yandje eendja dopamhepo kovalongeli vaJehova vakwao. Omupiya oo omudiinini oye a nangekwa po a kale te tu pe “eendya pefimbo lado.” — Lukas 12:42.

Omupiya oo oha pashukile eumbo, ile tu tye, eongalo laKalunga. (1 Timoteus 3:15) Jesus okwe lineekelela omupiya oo oshinakuwanifwa sha kwata moiti shokupashukila oilonga yoshitukulwa shehangano laJehova shokombada yedu, naasho osha kwatela mo okupashukila oiniwe yasho aishe, okuwilika oilonga yokuudifa noku tu honga okupitila momaongalo. Opo “omupiya omudiinini nomunaendunge” e tu pe ouyelele oo twa pumbwa nopefimbo opo twe u pumbwa, oha nyanyangida oishangomwa oyo hatu longifa moukalele nohe tu hongo okupitila mokwoongala nopoyoongalele.

Omupiya oo omudiinini molwaashi oha kala metwokumwe noshili yOmbibeli noha wanifa po noudiinini elombwelo lokuudifa onghundana iwa, nomunaendunge yo molwaashi oha file oshisho pandunge oinima yaKristus yokombada yedu. (Oilonga 10:42) Jehova ota nane ovanhu vahapu va ninge eendombwedi daye nota kwafele omupiya omudiinini nomunaendunge opo a yandje oikulya yopamhepo ihapu. — Jesaja 60:22; 65:13.

• Olyelye a nangekwa po kuJesus a palule ovahongwa vaye pamhepo?

• Omeenghedi dilipi omupiya e li omudiinini nomunaendunge?