Bifo Jizɔs day, i tɔk to Pita, Jems, Jɔn, ɛn Andru. I tɛl dɛn bɔt di sayn we gɛt fɔ apin bifo di wɔl dɔn. Dɔn i aks dɛn wan impɔtant kwɛstyɔn, i se: “Udat na di bɔy we tru to in masta ɛn we gɛt sɛns? Na di bɔy dat we in masta go mek edman fɔ ɔl di ɔda bɔy dɛn na di os, wɛn i de go patrol, ɛn di masta go tɛl am fɔ gi di ɔda bɔy dɛn, dɛn it wɛn di rayt tɛm rich.” (Matyu 24:3, 45; Mak 13:3, 4) Jizɔs bin de tɛl in disaypul dɛn se bifo di wɔl dɔn, i go pik pipul dɛn we go de tich di wan dɛn we de fala am. Udat na dis bɔy we Jizɔs bin de tɔk bɔt?

Na wan smɔl grup. Na sɔm pan Jizɔs in disaypul dɛn we Gɔd put in spirit pan, mekɔp dis grup. Na dis bɔy na di Gɔvnin Bɔdi. Na dis bɔy wi abop pan fɔ tich wi bɔt Jiova. Ɛn i kin tich wi di rayt tɛm.—Lyuk 12:42.

Na in Jizɔs put oba ɔl di tin dɛn we i gɛt. (Lyuk 12:44) Jizɔs gi dis bɔy big big wok fɔ du. I tɛl am fɔ kia fɔ di pat pan Jiova in ɔganayzeshɔn we de na di wɔl. Dat min se na in fɔ de kia fɔ ɔl di tin dɛn we di ɔganayzeshɔn gɛt, sho wi aw fɔ prich, ɛn tich wi. So fɔ lɛ di “bɔy we tru to in masta ɛn gɛt sɛns” ebul gi wi di tin dɛn we wi nid di rayt tɛm, i kin gi wi buk ɛn ɔda tin dɛn fɔ prich. Dɔn, i kin tich wi we wi go na mitin ɛn dɛn big program dɛn we wi kin gɛt.

Dis bɔy tru bikɔs i de tich wetin de na di Baybul ɛn i de prich di gud nyus to ɔda pipul dɛn. I gɛt sɛns bikɔs i de tek tɛm kia fɔ ɔltin we Jizɔs gɛt na di wɔl. (Di Apɔsul Dɛn Wok [Akt] 10:42) Jiova de mek bɔku pipul dɛn kam wɔship am. Ɛn i de ɛp dis bɔy fɔ tich wi bɔku tin.—Ayzaya 60:22; 65:13.

• Na udat Jizɔs pik fɔ tich in disaypul dɛn?

• Aw dis bɔy dɔn sho se i tru to in masta ɛn gɛt sɛns?