Ntangu fioti tekila Yesu kufua, yandi sololaka na banlonguki na yandi yiya: Petelo, Yakobi, Yoane na Andele, na kisika yina bau vuandaka kaka bau mosi. Ntangu Yesu vuandaka kuzabisa bau kidimbu ya kuvuanda na yandi na bilumbu ya nsuka, yandi yuvusaka kiuvu yayi ya mfunu mingi: “Nani mpenza kele nanga ya kukuikama mpe ya mayele yina mfumu na yandi metula yandi tanina bisadi ya yinzo na yandi, samu na kupesa bau madia na bau na ntangu yina mefuana?” (Matayo 24:3, 45; Marko 13:3, 4, NWT) Yesu zolaka banlonguki na yandi bazaba ti yandi, “mfumu” na bau, ketula bantu yina ketatamana kupesa bau madia ya kimpeve, yazola tuba nzayilu ya Nzambi, na ntangu ya nsuka. Nani zolaka vuanda nanga yango?

Bau kele banlonguki ya kedikakedika ya Yesu yina metulama mafuta na kimpeve. “Nanga” yango nde Kimvuka ya Ntuadisi. Yandi kepesaka basambidi yankaka ya Yehova madia ya kimpeve na ntangu mefuana. Beto ketulaka ntima na nanga yango ya kukuikama samu na kubaka “ndambu ya madia na beto na ntangu yina mefuana.”​—Luka 12:42.

Bau ketuadisaka yinzo ya Nzambi. (1 Timoteo 3:15) Yesu pesaka nanga yango kiyekua ya nene ya kutuadisa kisalu ya kitini ya nkubukulu ya Yehova awa na ntoto; yazola tuba kutanina bima na yau nionso, kutuadisa kisalu ya kusamuna, mpe kulonga beto na nzila ya bimvuka na beto. Yau yina, samu yandi pesaka beto yina beto mefuana na yau na ntangu mefuana, “nanga ya kukuikama mpe ya mayele” kena kukabula madia ya kimpeve na nzila ya mikanda yina beto kesadilaka na kisalu ya kusamuna, mpe na nzila ya malongi yina beto kebakaka na balukutakanu ya kimvuka mpe balukutakanu ya nene.

Nanga yango yandi kele ya kukuikama na malongi ya kedika ya Biblia mpe na kiyekua bapesaka yandi ya kusamuna nsangu ya mbote. Yandi kele diaka na mayele na mutindu yandi ketaninaka na nduenge mpenza bima ya Klisto awa na ntoto. (Bisalu 10:42) Yehova kena kusakumuna kisalu ya nanga yango samu bantu mingi kena kuma Bambangi mpe yandi kena kutatamana kubimisa madia ya kimpeve mingi.​—Yezaya 60:22; 65:13.

• Nani Yesu tulaka samu yandi pesaka banlonguki na yandi madia ya kimpeve?

• Na yinki mutindu nanga kele ya kukuikama mpe ya mayele?