Yeˍsuˆ maˇ suh sheˍ 3 nyi htaˇ, yawˇ ve awˬ laꞈ gʼawˇ 4 gʼaˇ Peˍtruˆ, Yaˍkoˆ, Yoˇhanˬ, leh Anˍdrehˍ geh tawˇ yaw daꞈ ve yoˬ. Yawˇ chehˇ taˍ tuˬ ve awˬ heˆ htaꞈ kʼoˆ piˇ ve teˇ yanˇ, yawˇ a yeˇ uiˍ ve na hkawˇ teˇ maˬ na piˇ ve yoˬ. “Ka tiꞈ yeˬ leh cuˇ yiˍ cawˬ ve awˬ ceˬ teˇ gʼaˇ lehˬ a shu le? Awˬ shehˍ hpaˇ ve yehˬ yaˇ kʼa yaˇ teˇ hpaˍ htaꞈ awˬ yanˇ cawˇ lehˍ caˇ tuˬ dawˬ tuˬ pehˬ piˇ tuˬ awˬ pon yawˇ ve awˬ shehˍ hpaˇ lehˬ awˬ ceˬ oˇ ve htaꞈ awˬ hoˉ te tcuh ve yoˬ.” (Maꞈhtehˍ 24:3, 45; Maˍkuˆ 13:3, 4) Yeˍsuˆ awˬ laꞈ gʼawˇ hui htaꞈ kʼoˆ maˍ piˇ ve, yawˇ yawˇ hui ve “awˬ shehˍ hpaˇ” hpehꞈ leh, awˬ leh ve awˬ yanˇ htaˇ, yawˇ teˇ hpaˍ hpaˍ htaꞈ leuˆ leh awˬ hoˉ te tcuh tuˬ yoˬ. Awˬ moˍ chi yawˇ awˬ hkʼaˇ suh kʼai ve chaw hui htaꞈ co ha hpawˇ caˇ tuˬ dawˬ tuˬ hkʼaˬ htaˆ kaꞈ gu teh piˇ tuˬ yoˬ. Ka tiꞈ yeˬ leh cuˇ yiˍ cawˬ ve awˬ ceˬ chi a shu le?

Yawˇ hui Gʼuiˬ sha ve leuˆ yuˬ taˍ ve chaw hui hkʼaw i ve teˇ moˍ hpehꞈ ve yoˬ. “Awˬ ceˬ” chi ve lehˬ Yaˬhoˉvaˬ ve Shaˉhkiˆhkanˍ ve chaw ve Uˉ peunˍ ve Kawˍmiˍtiˍ hpehꞈ ve yoˬ. Yaˬhoˉvaˬ ve chaw htaꞈ yawˇ hui co ha hpawˇ ve caˇ tuˬ awˬ yanˇ cawˇ lehˍ caˍ piˇ ve yoˬ. Ka tiꞈ yeˬ ve awˬ ceˬ chi “awˬ yanˇ cawˇ lehˍ caˇ tuˬ dawˬ tuˬ pehˬ” laˇ tuˬ ve htaꞈ ngaˬ hui loˍ ve yoˬ.—Luˉkaꞈ 12:42.

Yawˇ hui Gʼuiˬ sha ve yehˬ kʼa htaꞈ nyi haꞈ shaˉ ve yoˬ. (1 Tiˆmoˉseˍ 3:15) Yeˍsuˆ awˬ ceˬ chi ve htaꞈ a yeˇ uiˍ ve awˬ vuiˬ piˇ ve yoˬ. Yawˇ yawˇ hui htaꞈ miˬ guiˬ chi hkʼoˆ lo Yaˬhoˉvaˬ ve kanˉ hkʼaˇ nyi haꞈ shaˉ tcuh ve yoˬ. Yawˇ hui Hkriꞈ yaˇ awˬ moˍ cuˇ leh ngaˬ hui htaꞈ maˍ leh, hto toˇ ve kanˉ leh Gʼuiˬ sha ve kanˉ hkʼaˇ ve mawˇ jeˬ kaꞈ nyi haꞈ shaˉ chehˇ ve yoˬ. “Ka tiꞈ yeˬ leh cuˇ yiˍ cawˬ ve awˬ ceˬ” lehˬ hto toˇ ve kanˉ hkʼaw yehˇ ve liꞈ kʼoˆ teˇ hpaˍ, hpawnˬ daꞈ ve leh hpawnˬ daꞈ lonˉ htaˇ maˍ ve awˬ lawn cuˇ leh co ha hpawˇ caˇ tuˬ cawˇ ve awˬ yanˇ htaˇ, ngaˬ hui htaꞈ pehˬ laˇ chehˇ ve yoˬ.

Awˬ ceˬ chi Liꞈ hpu hkʼaw awˬ tehˬ ve leh daꞈ ve awˬ lawn sha tanˇ hto toˇ ve awˬ vuiˬ htaꞈ ka tiꞈ yeˬ ve yoˬ. Yawˇ hui miˬ guiˬ hkʼoˆ Yeˍsuˆ Hkriꞈ ve mawˇ htaꞈ nyi haꞈ shaˉ htaˇ cuˇ yiˍ cawˬ ve yoˬ. (Tcuh yaˇ 10:42) Yaˬhoˉvaˬ yawˇ hui ve kanˉ htaꞈ awˬ bon naꞈ piˇ ve pa taw, kanˉ oˇ ve uiˍ la mvuh la leh co ha hpawˇ ve caˇ tuˬ hkʼa biˇ cawˬ ve yoˬ.—Iˉsaˍyaˆ 60:22; 65: 13.

• Yeˍsuˆ ve awˬ laꞈ gʼawˇ htaꞈ co ha hpawˇ caˇ tuˬ pehˬ piˇ tuˬ, yawˇ a shu htaꞈ leuˆ teh ve le?

• Awˬ ceˬ chi hkʼaˬ hkʼe te ka tiꞈ yeˬ ve le? Yawˇ hui hkʼaˬ hkʼe te cuˇ yiˍ cawˬ ve le?