Yesu, kumeso kwa kufwa, wēsambile pafula na bana bandi ba bwanga baná—ba Petelo, Yakoba, Yoano, ne Andele. Yesu pa kulaya kiyukeno kikayukanya kwikala’po kwandi mu mafuku a mfulo, wāipangwile kipangujo kya mvubu amba: “Na bubine, le umpika mukōkele ne mudyumuke i ani le, utongelwe na Mfumwandi kulama bengidi bandi ba mu njibo, kwibapa byakudya byabo pa kitatyi kifwaninwe?” (Mateo 24:3, 45; Mako 13:3, 4) Yesu wākulupije bandi bana ba bwanga’mba, byadi ‘mfumwabo,’ wadi wa kutonga bantu bamo ba kupa nyeke balondi bandi byakudya bya ku mushipiditu mu kitatyi kya ku mfulo. Le i bāni badi ba kubadilwa mu uno umpika?

I kakisumpi ka balondi bashingwe māni ba Yesu. Uno “umpika” uyukene patōka’mba i Kitango Kyendeji kya Batumoni ba Yehova. Upānga batōtyi nandi ba Yehova byakudya bya ku mushipiditu pa kitatyi kifwaninwe. Tutalanga’nka uno umpika mukōkele etupe nyeke ‘kipimo kyetu kya byakudya pa kitatyi kifwaninwe.’—Luka 12:42.

Ulamanga ba mu njibo ya Leza. (1 Temote 3:15) Yesu wāpele umpika mwingilo ulēma wa kulama mwingilo wingilwa na kipindi kya pano panshi kya bulongolodi bwa Yehova—kutala bituntwa, kwendeja mwingilo wa busapudi, ne kwitufundija kupityila ku bipwilo. O mwanda, pa kwitupa byobya byotusakilwa mu kitatyi kifwaninwe, “umpika mukōkele ne mudyumuke” wabanyanga byakudya bya ku mushipiditu kupityila mu mabuku otusapulanga nao, ne kupityila ku mpangiko ipitanga ku kupwila ne ku bitango byetu.

Uno umpika i mukōkele ku bubine bwa mu Bible ne ku mwingilo wapelwe wa kusapula myanda miyampe, kadi i mudyumuke mu muswelo walama senene tumweno twa Kidishitu tudi pano pa ntanda. (Bilongwa 10:42) Yehova weselanga mwingilo wandi na kubweja’ko bantu bavule ne byakudya bya ku mushipiditu.—Isaya 60:22; 65:13.

• Lelo i ani utongelwe na Yesu kudisha bandi bana ba bwanga ku mushipiditu?

• Lelo umpika i mukōkele ne mudyumuke mu buluji’ka?