XØRꞸ 19
¿Kjo nge “kʼe mbɇpji” kʼꞹ “kjaa kʼua ja nzi ga mama o lamu ñe kʼꞹ kjijñi na joo”?
Texe søø ra pa̱rgoji ja ga kjaa kʼo mama e Jehová
Ma dya kja mi bʼɇzhi na punkjꞹ paa ma ro mbøtrʼꞹji e Jesús. Angeze mi bʼꞹbʼꞹ ko e Pedro, e Santiago, e Juan ñe e Andrés, mi ñaji. E Jesús go xipjiji pje ro kjogꞹ kja ne Xoñijomꞹ ma ro manda ajensʼe ñe ma dya kja ro mezhe ro nguarꞹ texe kʼo na sʼoo kja ne Xoñijomꞹ. Kjanu o tsjapꞹ trʼønꞹ kʼo apostole, go xipjiji ga kjaba: “¿Kjo nge kʼe mbɇpji kʼꞹ na kjuana kjaa kʼua ja nzi ga mama o lamu ñe kʼꞹ kjijñi na joo, kʼꞹ nu lamu o ñɇme kja kʼo ñaja mbɇpji ngekʼua ra unꞹ pje ra ziji kʼe nrrajme ke ra sⱥntrʼⱥji?” (Mateo 24:3, 45, TNM; Marcos 13:3, 4). E Jesús ngeje kʼe lamu, kʼe mbɇpji ngeji ntee ke e Jesús o ñɇme ngekʼua ro jichiji in dyoji ro tsjaji ja ga nee e Jehová, jesta ma ra sⱥjⱥ yo paa ma ra nguarꞹ kʼo na sʼoo kja ne Xoñijomꞹ. ¿Kjo nge kʼe mbɇpji kʼꞹ go mama e Jesús?
Janzi bʼɇzo kʼꞹ ra moji ajensʼe pjøsʼꞹji o dyoji. “Kʼe mbɇpji” ngeje kʼe Cuerpo Gobernante yo Testigo e Jehová. Angezeji jitsʼkojme ra kjajme ja ga nee e Jehová. Ngextrjo kʼe mbɇpji dyakꞹjme kʼo ra xørgojme ngekʼua ra pjechijme kʼo mama Mizhokjimi (Lucas 12:42).
Kʼe mbɇpji pjørꞹ nrrexe kʼo pɇsʼi Mizhokjimi kja ne Xoñijomꞹ (Lucas 12:44). E Jesús o xipji “kʼe mbɇpji” ro tsjaa na bʼɇpji kʼꞹ me na nojo. Angezeji pjørꞹji nrrexe kʼo pɇsʼi e Jehová kja ne Xoñijomꞹ. Jitsʼkojme ja rga zopjꞹjme o Jñaa e Mizhokjimi. Penkezgojme yo skuama ke ra xørgojme kja congregación ñe yo skuama kʼꞹ ri sopkʼꞹjme yo ntee ma ri pa jichijme kʼo mama ne Biblia. Kjaji yo discurso ke ri ⱥrⱥjme nu ja ri jmurgojme ñe kja yo asamblea.
“Kʼe mbɇpji” kjaa kʼua ja nzi ga mama o lamu, nangeje kjaa kʼo mama ne Biblia ñe jichi yo ntee ngekʼua ra mba̱ra̱ji Mizhokjimi. Xo kjijñi na joo, nangeje pjørꞹ na joo yo in dyoji ñe texe kʼo pje nrre pɇsʼi e Jesús kja ne Xoñijomꞹ (Hechos 10:42). Ixi ñetsʼe ke e Jehová pjøsʼꞹ yo kjuarmayo ngekʼua ra tsjaji na joo o bʼɇpji, nange na punkjꞹ ntee kʼꞹ a na pjechiji kjo nge e Jehová (Isaías 60:22; 65:13).
-
¿Kjo nge kʼꞹ go ñɇme e Jesús ngekʼua ra mbøxkꞹjme ra kjajme ja ga nee e Jehová?
-
¿Pjekja søø ri manji ke kʼe mbɇpji kjaa kʼua ja nzi ga mama o lamu ñe kjijñi na joo?
