Iesu do se mase ai, ia na Petro, Iakobo, Ioane bona Andrea ida mo e herevahereva. Iesu ese ena noho negana bona nega dokona toana e perovetalaia neganai, ina henanadai badana e heni: “Hesiai tauna mai ena kamonai bona mai ena kara maoromaoro, biaguna ese e abia hidi, ena ruma baine reḡua bona aniani negadia ai memero adia malamala baine henidia, tauna be daika?” (Mataio 24:3, 45; Mareko 13:3, 4) Iesu na dia malamala o aniani korikori e herevalaia, a Dirava ena Hereva na aniani ida e haheḡereḡerea. Iesu ese ena hahediba e hamaorodia ia na idia ‘biagudia,’ bona nega dokonai haida baine abidia hidi, hanaihanai ena taunimanima bae ubudia. Una hesiai tauna be daika?

Iesu e badinaiamu horoa taudia amo e abia hidi orea maraḡina. Una “hesiai tauna” na Iehova ena Witnes taudia edia Heitatao Oreana. Ia na nega korikori ai Iehova ena taunimanima e ubudiamu. Ai na una hesiai tauna mai ena kamonai enai a tabekaumu, hanaihanai ‘amai baine heni’ totona.—Luka 12:42.

Dirava ena orea e reḡuamu. (1 Timoteo 3:15) Iesu ese hesiai tauna e henia maduna badana na tanobada ai Iehova ena orea baine reḡua, heḡereḡere haroro ḡaukara e hakauamu, kongrigeisen amo ai e hadibamaimu, bona Kingdom Hall bona ḡau ma haida e narimu. Danu, “hesiai tauna” na nega korikori ai haroro ai a ḡaukaralaimu pablikeisen bona emai hebou maraḡidia bona badadia amo Dirava ena hereva e halasimu.

Hesiai tauna na mai ena kamonai badina Baibel ena hereva momokanidia e badinamu bona sivarai namona e harorolaiamu. Ia na mai ena kara maoromaoro badina Keriso ena kohu tanobada ai e reḡudia namonamomu. (Kara 10:42) Iehova ese hutuma na ena orea ai e hakaudia vareaimu, bona ia ese hesiai tauna e duruamu hereva momokanidia e halasimu.—Isaia 60:22; 65:13.

• Iesu be daika e abia hidi Dirava ena hereva amo iena hahediba baine ubudia?

• Dahaka dainai hesiai tauna na mai ena kamonai bona kara maoromaoro?