Mua kele ku hiehi na ku-tsa ceni, Yesu ua handekele na vandongesi veni vauana kua lika liavo​—Petulu, Tiango, Yoano na Anduleu. Omo ua va lekele citantekeyeso ca kuiza ceni ku matangua a ku kotokela, ua katuile cihula ca seho, ngueni: “Iyandzo na pu mukuamanda ua cili ua mana, muangana ueni na mu sila ku niunga vakua ndzivo yeni, ku va pangela ku-lia cavo ku ntsimbu ya ku lia?” (Mateo 24:3, 45; Mako 13:3, 4) Yesu mu ku pua “muangana,” ua kulahesele vandongesi veni ngueni, a ka va sila vaze va ka va hana-hana via-ku-lia via mu lutsilielo ku matangua a ku kotokela. Veya ua hanguile ku kala mu civunga ca mukuamanda uaco?

Ca pua civunga ca cindende ca vakua ku kava Yesu va ku vuavesa. “Mukuamanda” ua pua civunga ca Vantuamena ca Vakaleho va Yehova. Ve ku hana via-ku-lia via mu lutsilielo kuli Vakua ku lemesa Yehova. Tua hitukila ha civunga ca mukuamanda ua cili, linga ci tu hane “via-ku-lia ku ntsimbu ya ku-lia.”​—Luka 12:42.

Ve ku niunga via ndzivo ya Njambi. (1 Timoteo 3:15) Yesu ua hele vakua civunga ca mukuamanda cipanga ca kama cikuma ca ku-endesa vipanga viose via mutamba ua ha mavu ua lukungulukilo lua Yehova​—mu ku tala via vikuata via lukungulukilo, ku tuamenena vipanga via ku ambulula kaha na ku tu longesa mu vikungulukilo. Linga va tu hane via tondeka mu ntsimbu yaco, vakua civunga ca “mukuamanda ua cili mukua mana” ve ku hana via-ku-lia viaco ku hitila mu mavulu na mikanda i tue ku pangesa mu ku ambulula cetu. Cikuavo naua ve ku tu tuma vilongesa vi tue ku lilongesa ku vikungulukilo na ku viuano.

Mukuamanda ua pua ua cili mu ku kava mpundu vilongesa via Mbimbiliya na na ku puisamo cipanga cavo ca ku ambulula muzimbu ua cili kaha ua pua ua mana mu ku niunga mua cili vupite vua Kilistu vu li ha mavu. (Vilinga 10:42) Yehova a li na ku vezikisa cipanga ca mukuamanda mu ku lania vantu vavengi linga va pue Vakaleho veni kaha na ku va hana via-ku-lia via vingi via mu lutsilielo.​—Isaya 60:22; 65:13.

• Yesu ua hanguile iya linga a lise vandongesi veni mu lutsilielo?

• Civunga ca mukuamanda ca pua ca cili kaha ca mana mu njila ika?