Taani Ori Kapuro Ororomeleya ni Amiruku?

Ahaakumve okhwa, Yesu aavaanela wiiphini ni oohuserya awe asese—Petro, Yakopo, Yohane, ni Antreya. Vaavaa Yesu aalonceiye sa eneneeryo ya orwa wawe mmahiku ookuchula, owo aapaka nikoho nookhweleya: “Tani ori kapuro óroromeleya [ni amiruku], yowo pwiya’we ámkilathihaliye óweherya va nloko nawe, wavaha sólya va elukuluku yaphama?” (Mateyu 24:3, 45; Marko 13:3, 4) Yesu ntoko “pwiya” aya aahaaroromeliha oohuserya awe, wi aahaala waathanla yaale yaahaala otitelela ovaha soolya soomunepani wa oomuchara awe mu elukuluku yookuchula. Taani aahaala okhala kapuro yoola?

Nla nikhuuru nikhaani na oomuchara awoocihiwa a Yesu. “Kapuro” oneemelela Nikhuuru Noolamulela na Anamoona a Yehova. Owo onnavaha soolya soomunepani va elukuluku aya wa alapeli akhwaaya a Yehova. Ninnamuroromela kapuro oororomeleya wi anivahe ‘iphika sahu va elukuluku aya.’—Luka 12:42.

Nla Ninneeciha emusi ya Muluku. (1 Timoteo 3:15) Yesu oomvaha kapuro murici mutokotoko wa weeciha nikupa na vathi na marehereryo a Yehova—othokororya ichu soomwiilini, ohoolela muteko woolaleerya, ni onihusiha moorweela wa miloko sahu. Mwawiihiiha, wi anivahe yeeyo nnachunaahu nave ti liini, “kapuro óroromeleya [ni amiruku]” onnakawa soolya soomunepani moorweela wa soolaleeryiwa nnaaparihelaahu muteko mu orummwa wahu, nave tho moorweela wa miyaha sinalociwa mmithukumano sa muloko ni sa ikulucu.

Kapuro ti oororomeleya vooloca sa eparipari ya Piipiliya ni muteko awe wa olaleerya michaka yaphaama, nave ti amiruku vooloca sa okhapelela sookhwela sa Kiristu veelaponi ya vathi. (Saweriwa Tarummwa 10:42) Yehova onnareeliha muteko awe ni waacereryeya ni soolya sincipale soomunepani.—Yesaya 60:22; 65:13.

▪ Taani othanliwe ni Yesu wi aalyiheke oohuserya awe omunepani?

▪ Mukhalelo taani kapuro okhanleiye oororomeleya ni amiruku?