Harikuburayo obwire bukye Yesu akaitwa, akagaaniiraho na bana aha ntumwa ze, Petero, Yakobo, Yohaana na Anderea. Yesu arikugamba akamanyiso akaakworekire okubaho kwe omu biro by’emperu, akabuuza ati: “Ni mwambari ki ow’okwesigwa kandi ow’obwengye, ou mukama we yaatsigiire ab’omu ka ye kubagaburira omu bunaku obuhikire?” (Matayo 24:3, 45; Mako 13:3, 4) Yesu akaba naahamiza abeegi be ngu nka “mukama,” waabo, naija kutoorana abaraagume nibaha abakuratsi be eby’okurya eby’omwoyo omu biro by’emperu. Ni baahi abu yaabaire naija kutoorana kuba omwambari?

N’abakuratsi ba Yesu bakye abashukirweho amajuta. ‘Omwambari’ ni Akakiiko Akareeberezi ak’Abajurizi ba Yehova. Naaha abaramya ba Yehova bagyenzi be eby’okurya eby’omwoyo. Omwambari ogu niwe arikuguma naatuha ‘omugabo gwaitu gw’eby’okurya omu bunaku obushemereire.’—Luka 12:42.

Naareeberera ekibiina kya Ruhanga. (1 Timoseo 3:15) Yesu akaha omwambari obujunaanizibwa bw’amaani obw’okureeberera ekicweka eky’omu nsi eky’ekibiina kya Yehova. Naareeberera ebintu by’ekibiina kya Yehova, ayebembera omurimo gw’okubuurira kandi atwegyesa. N’ahabw’ekyo, ‘omwambari ow’okwesigwa kandi ow’obwengye’ naatuha eby’okurya eby’omwoyo omu bunaku obuhikire, kurabira omu bitabo ebi turikukoresa omu kubuurira, omu nteerane zaitu z’ekibiina hamwe n’enteerane empango.

Omwambari n’omwesigwa ahabw’okuba naahamira aha mazima ga Baibuli n’aha murimo gw’okubuurira amakuru marungi, kandi n’omunyabwengye aha ku arikureeberera ebintu bya Kristo ebiri omu nsi. (Ebyakozirwe 10:42) Yehova naahwera abantu baingi kuba abajurizi be kandi naahwera omwambari ow’okwesigwa kandi ow’obwengye kuha abantu be eby’okurya eby’omwoyo.—Isaaya 60:22; 65:13.

• N’oha ou Yesu yaatooraine kuguma naareeberera abakuratsi be omu by’omwoyo?

• Ni mu miringo ki ei omwambari ari ow’okwesigwa kandi ow’obwengye?