Киристе ӕ мӕлӕти разӕй дзубанди кодта ӕ ахуркӕнуйнӕгтӕй цуппарей хӕццӕ – Петур, Иаков, Иоанн ӕма Андреййи хӕццӕ. Дзурдта син аци дуйней фӕстаг бӕнттӕ кӕд ӕрлӕудзӕнцӕ ӕма Паддзахи бартӕ ӕ къохмӕ кӕд райсдзӕй, уой туххӕй, удта ма син загъта: «Ка ӕй еци ӕууӕнкгун ӕма зундгин цагъар, ӕ хецау ӕ хӕдзаронти ке барӕ бакодта, цӕмӕй син хуӕруйнаг афойнадӕбӕл дӕтта?» (Матфейи 24:3, 45; Марки 13:3, 4). Аци дзурдтӕй Киристей зӕгъун фӕндадтӕй, ӕма «хецау», гъома ӕхуӕдӕг, ӕ фӕдбӕлдзӕугути сӕргъи исӕвӕрдзӕй, ка сӕбӕл тухса, уӕхӕн адӕми къуар. Етӕ фӕстаг бӕнтти дӕтдзӕнцӕ, ӕууӕндундзийнадӕ ка федар кӕнуй, уӕхӕн хуӕруйнаг. Цума еци «цагъар» ка ӕй?

Е ӕй Киристей исӕрст фӕдбӕлдзӕугути минкъий къуар. Еци «цагъар» ӕй Йегови Ӕвдесӕнти разамонӕг совет. Е, Йеговӕн ка ковуй, уонӕн еугуремӕндӕр дӕттуй ӕууӕндундзийнадӕ федаргӕнӕн хуӕруйнаг. Еци цагъар ку н’ адтайдӕ, уӕд «нӕ хуӕруйнаги хай афойнадӕбӕл» нӕ истайанӕ (Лукай 12:42).

Е разамунд дӕттуй Хуцауи «бийнонтӕн» (1 Тимофеймӕ 3:15). Йесо цагъарӕн ӕ барӕ бакодта, Йегови организаци зӕнхӕбӕл ци устур куст кӕнуй, уой. Еци цагъар ӕ гъос даруй организаций есбонмӕ, разамунд дӕттуй игъосун кӕнуни гъуддаги ӕма нӕ ӕмбурдти фӕрци ахур кӕнуй. «Ӕууӕнкгун ӕма зундгин цагъар» нин хуӕруйнаг дӕттуй аллихузи публикацити фӕрци, удта ӕмбурдти ӕма конгрессти фӕрци дӕр.

Еци цагъар ӕууӕнкгун уомӕн ӕй, ӕма Хуцауи Дзурдбӕл федар хуӕцуй ӕма ин ӕ Хецау ци баихӕс кодта, уой кӕдзос цӕсгонӕй ӕнхӕст кӕнуй – игъосун кӕнуй хуарз хабар. Зундгин ба уомӕн ӕй, ӕма ин Киристе зӕнхӕбӕл ӕ барӕ цидӕриддӕр бакодта, уомӕ ӕ гъос даруй ӕма алли гъуддаги дӕр лӕдӕргӕй архайуй (Гъуддӕгтӕ 10:42). Йеговӕ син сӕ хъиамӕтӕн арфӕ кӕнуй. Е бӕрӕг ӕй, ӕ лӕггадгӕнгутӕ фулдӕрӕй-фулдӕр ке кӕнунцӕ ӕма син ӕууӕндундзийнадӕ федаргӕнӕн хуӕруйнаг парахаттӕй ке ес, уомӕй (Исай 60:22; 65:13).

• Йесо кӕмӕн баихӕс кодта ӕ фӕдбӕлдзӕугутӕн хуӕруйнаг дӕттун?

• Еци цагъар ӕууӕнкгун ӕма зундгин ке ӕй, е цӕмӕй бӕрӕг ӕй?