اپنی موت توں تھوڑی دیر پہلاں یسوع مسیح نے اپنے چار شاگرداں پطرس،‏ یعقوب،‏ یوحنا تے اندریاس نال گل بات کیتی۔‏ اوہناں نے شاگرداں نُوں اخیر زمانے وچ اپنی موجودگی دے نشان بارے دسیا۔‏ ایس گل بات دے دوران اوہناں پچھیا کہ اوہ وفادار تے سمجھ‌دار غلام اصل وچ کون اے جنہوں اوہدے مالک نے اپنے گھر دے غلاماں تے مقرر کیتا اے تاکہ اوہناں نُوں ویلے سِر کھانا دوے؟‏ (‏متی 24:‏3،‏ 45؛‏ مرقس 13:‏3،‏ 4‏)‏ یسوع مسیح اپنے شاگرداں نُوں یقین دوا رہے سن کہ اوہ اخیر زمانے دوران کجھ ایسے لوکاں نُوں مقرر کرن گے جیہڑ‌ے اوہناں دے شاگرداں نُوں کھانا یعنی پاک کلام دی تلیم لگاتار دین گے۔‏ ایس کم لئی یسوع مسیح نے کِنہوں مقرر کیتا؟‏

ایہہ غلام یسوع مسیح دے پیروکاراں دا چھوٹا جیہا گروہ اے جنہوں پاک روح نال چُنیا گیا اے۔‏ وفادار تے سمجھ‌دار غلام اصل وچ یہوواہ دے گواہواں دی گورننگ باڈی اے۔‏ گورننگ باڈی یہوواہ خدا دے سارے خادماں نُوں پاک کلام دی تلیم دیندی اے۔‏ صرف ایس وفادار غلام توں ای سانوں ویلے سِر تے لوڑ مطابق کھانا مِل سکدا اے۔‏—‏لُوقا 12:‏42‏۔‏

ایہہ غلام خدا دے گھرانے یعنی کلیسیا دی دیکھ بھال کردا اے۔‏ ‏(‏1-‏تیمُتھیُس 3:‏15‏)‏ یسوع مسیح نے ایس غلام نُوں یہوواہ خدا دی تنظیم دی دیکھ بھال کرن دی بھاری ذمےداری دِتی اے۔‏ ایہہ غلام تنظیم دی جائیداد دی سانبھ سنبھال کر دا اے،‏ منادی دے کم دی رہنمائی کردا اے تے کلیسیاواں دے ذریعے تلیم دیندا اے۔‏ وفادار تے سمجھ‌دار غلام سانوں ویلے سِر تے لوڑ مطابق کھانا دین لئی کتاباں تے رسالیاں،‏ عبادتاں تے کنونشناں دا انتظام کردا اے۔‏

ایہہ غلام ایس لئی وفادار اے کہ ایہہ بائبل دِیاں سچائیاں نُوں صحی صحی دسدا اے تے خوشخبری دی منادی پُوری لگن نال کردا اے۔‏ (‏اعمال 10:‏42‏)‏ ایہنوں سمجھ‌دار ایس لئی کہیا جاندا اے کیونکہ ایہہ بڑی عقل‌مندی نال زمین تے مسیح دی میراث دی دیکھ بھال کردا اے۔‏ ایہدے چ کوئی شک نئیں کہ یہوواہ ایس غلام نُوں برکت دے رہیا اے۔‏ ایس لئی پاک کلام دیاں سچائیاں دی خوشبو ہر پاسے پھیل رہی اے تے بوہت سارے لوک یہوواہ دی تنظیم وَل کِھچے چلے آ رہے نیں۔‏—‏یسعیاہ 60:‏22؛‏ 65:‏13‏۔‏

• یسوع مسیح نے اپنے شاگرداں نُوں کھانا دین لئی کِنہوں مقرر کیتا اے؟‏

• ایہہ غلام کیس لحاظ نال وفادار تے سمجھ‌دار اے؟‏