Jesusga huañuna huras pactamujpi, apóstol Pedrohua, Santiagohua, Juanhua, Andreshuambas cuintaushcai, tucuri punzhaunai pai mandana callarinara rimausha tapuca: “¿Pitangai ali llaquij iyaiyuj sirvij runa, paihua patrún huasira cuirangaj churaca, chihui ajcunara ali hurasbi carangaj?” (Mateo 24:3, 45; Marcos 13:3, 4). Shina nishaga, Jesús ali patrún cuinta tucuri punzhaunai, paita catijcunara ali yachachisha, ali cuirashas catingahuaga huaquingunara mingangaraushcara ricuchica. Cai mingashca ‘sirvij runaga’ ¿pigunara anun?

Ispíritu santuhua ajllashca, Jesusta ali catijcunami anun. Cai ‘sirvij runaga’ ispíritu santuhua quirij ajllashcauna, Jehovahuaj testigogunamandallarami, Jehovahuaj testigogunara cuiraj muntun an. Jehová Diosta adoraj huauquiunara, paiguna ministishca hurasbi Diospa shimimanda alira yachachinun. Ali llaquij iyaiyuj sirvij runaga ministishca tupura “micuna hurasbi” caranmi (Lucas 12:42).

Diospa huasira ali cuiranunmi (1 Timoteo 3:15). Jesusga cai organizacionda shinzhi tarbasha ñaupama pushanara “sirvij runa” maquii saquica. Jesús charishcaunara cuirana, Diospa Shimimanda rimanara ali pushanas, shinallara ñucanchira Bibliamanda ali yachachina, “sirvij runa” maquii tian. Chiraigumanda ministishcaunara, ministishca hurasbi carangahua, “ali llaquij iyaiyuj sirvij runa” Bibliamanda quillcaunai, tandarinaunai, asambleagunais alira yachachinunmi.

Cai ‘sirvij runaga’, Biblia yachachishcallara quirishcamanda, shinallara Diospa Shimi rimanara ali pactachishcamanda ali llaquij anmi. Astaumbas Cristo munaira cai Allpai ali iyaihua rurashcamanda iyaiyuj anmi (Rashcauna [Hechos] 10:42). Jehová Diosga ali llaquij iyaiyuj sirvijta ashcara bendiciaunmi mas Jehovahuaj testigoguna tucunuchu nisha. Shinallara Bibliara mas intindingahua Jehová chi sirvijta yanapaun (Ricuchina [Apocalipsis] 7:9, 16, 17).

• Jesusga paita catijcunara Bibliamanda yachachinuchu nisha ¿pigunarara mingashca?

• Cai ‘sirvij runaga’ ¿imarashara ninchi ali llaquij iyaiyuj ashcara?