Nabut ďivesa angle peskero meriben, o Ježiš vakerelas peskere 4 apoštolenca, le Petroha, Jakuboha, Janoha the le Andrejiha. O Ježiš imar anglal phenďa, pal soste šaj sprindžaraha, hoj dživas andro posledna ďivesa, phučľa: Ko hino čačes verno the goďaver otrokos, saves leskero Raj thoďa upral peskeri domacnosť, kaj len te del lengero chaben andro spravno časos? (Matúš 24:3, 45; Marek 13:3, 4) O Ježiš peskere učeňikenge phenďa, hoj ov, sar lengero Raj, kidela avri ajse manušen, so furt pripravinena o duchovno chaben prekal leskere nasledovňika andro posledna ďivesa. Ko patrinel ke ada otrokos?

Ča paru pomazana nasledovňika le Ježišoskere. Ada otrokos hine o phrala, so ľidžan amari organizacija. On pripravinen aktualno duchovno chaben prekal savore Jehovaskere služobňika. Ada duchovno chaben andro spravno časos le verne otrokostar amenge igen kampel. (Lukáš 12:42)

On ľidžan le Devleskeri domacnosť. (1. Timotejovi 3:15) O Ježiš le otrokos diňa bari buťi te ľidžal caľi časť le Jehovaskera organizacijatar, savi hiňi pre phuv. Starinel pes pal o hmotno majetkos, dodikhel pre zvestovaťeľsko služba a sikavel amen prekal o zbori. O verno the goďaver otrokos amen del duchovno chaben prekal o publikaciji, savenca phiras andre služba the prekal o programos, so amen hin pro zhromažďeňa the pro zjazdi.

Hino verno, bo pes verňe ľikerel le biblicke čačipnastar a verňe zvestinel e lačhi sprava. Hino goďaver, bo pes goďaverones starinel pal o Kristoskere zaujmi pre phuv. (Skutky 10:42) O Jehovas žehňinel adi buťi avka, hoj pricirdel ke peste furt buter manušen a prekal ada otrokos amen igen mište duchovňe čaľarel. (Izaiáš 60:22; 65:13)

• Kas o Ježiš diňa buťi, kaj te den leskere učeňiken duchovno chaben?

• Soske šaj phenas, hoj o otrokos hino verno the goďaver?