Ityough 19
Ka An Nan Lu Wanakiriki u Jighjigh man u Fan Kwagha?
Se cii se mba ye kwaghyan u ken jijingi
Er shighe zurum u Yesu una kpe yô, a lam vea mbahenen nav mbagenev unyiin, ve yô, lu Peteru man Yakobu man Yohane man Anderia. Yesu ngur pasen ve kwagh u una lu ikyav i mve na ken ayange a masetyô yô, a pine mpin u injaa ne, ér: “Yô, ka an nan lu wanakiriki u jighjigh man u fan kwagh u ter u nan una wa nan ya sha ikyev sha u nana naan ve kwaghyan sha ashighe ashighe?” (Mateu 24:3, 45; Marku 13:3, 4) Yesu lu pasen mbahenen nav ér, er un lu “ter” ve yô, una tsua mba vea naan mbadondon un kwaghyan u ken jijingi la hanma shighe ken ayange a masetyô ne yô. Ka unô vea lu nongo u wanakiriki nee?
Ka mbadondon Yesu mba mimi, mba i tsegh ve sha jijingi la. Mba ve lu nongo u “wanakiriki” ne mba ne mba ve civir Yehova a ve imôngo la kwaghyan u ken jijingi sha shighe vough. Se mba suur sha nongo u wanakiriki u jighjigh ne sha u u za hemen u “karen [se] kwaghyan sha ashighe ashighe.”—Luka 12:42.
Mba nengen sha ya u Aôndo. (1 Timoteu 3:15) Yesu yange na wanakiriki ne tom u vesen ér a̱ nengen sha tom u nongo u Yehova u eren shin tar la; lu u una nengen sha akaa a nongo ne u lu a mi la, shi una tesen se ken atôônanongo shi una tesen se er se eren tom u pasen kwagh la kpaa. Sha nahan yô, “wanakiriki u jighjigh man u fan kwagh” ne ngu samber a kwaghyan u ken jijingi sha u gberen ityakerada i se eren tom wase u pasen kwagh a mi la. Akaaôron a se ungwan ken mbamkombo man sha mbamkohol asev la kpa ka gbenda ugen u a lu samber a kwaghyan ne yô. Nahan ngu nan se kwagh u kwagh a gbe se a mi la sha shighe u se soo la.
Nongo u wanakiriki la ngu dondon mimi u Bibilo shi pasen loho u dedoo u i kaa ér u pase la sha jighjigh. Shi ngu eren kwagh sha kwaghfan, sha ci u ngu nengen sha akaa a Kristu a shin tar la sha inja. (Aerenakaa 10:42) Yehova ngu veren tom u nongo ne u eren la doo doo, ngu urugh ior mba hingir mbashiada nav shi ngu wasen nongo ne u samber a kwaghyan u ken jijingi mgbeghaa.—Yesaia 60:22; 65:13.
-
Ka unô Yesu yange tsua ve ér ve koson mbahenen nav ken jijingii?
-
Ka sha nyi gbenda nahan nongo u wanakiriki la u eren kwagh sha jighjigh man sha kwaghfana?
Kwagh Ugen u Alaghga Shi Una Doo U Yô
IYOUKURA (I HENEN)
“Ka An Nan Lu Wanakiriki u Jighjigh man u Fan Kwagh?”
Ngeren ne ta iwanger sha mkav u se lu a mi sha kwagh u wanakiriki u jighjigh man u fan kwagh la. Ôr nenge er mkpeyol wase u ken jijingi la a har sha wanakiriki ne yô.
