Taimi nounou ki mu‘a he‘ene pekiá, na‘e talanoa fakaekinautolu ai ‘a Sīsū mo e toko fā ‘o ‘ene kau ākongá​—ko Pita, Sēmisi, Sione mo ‘Anitelū. ‘I hono tomu‘a tala ‘e Sīsū ‘a e faka‘ilonga ‘o ‘ene ‘i heni ‘i he ngaahi ‘aho faka‘osí, na‘á ne ‘ohake ai ha fehu‘i mātu‘aki mahu‘inga: “Ko hai mo‘oni koā ‘a e tamaio‘eiki anga-tonu mo potó ‘a ia kuo fakanofo ‘e he‘ene ‘eikí ke ne tokanga‘i ‘a e kau sevāniti ‘i hono falé, ke ‘oange kiate kinautolu ‘a ‘enau me‘akaí ‘i he taimi totonu?” (Mātiu 24:3, 45; Ma‘ake 13:3, 4) Na‘e fakapapau‘i ange ‘e Sīsū ki he‘ene kau ākongá ‘o pehē ‘i hono tu‘unga ko honau “‘eikí,” te ne fakanofo ‘a e fa‘ahinga ko ia te nau tokonaki ha me‘akai fakalaumālie hokohoko ma‘a hono kau muimuí lolotonga ‘a e taimi ‘o e ngata‘angá. Ko hai ‘e fa‘u‘aki ‘a e tamaio‘eiki ko ení?

Ko ha ki‘i kulupu tokosi‘i ‘o e kau muimui pani ‘o Sīsū. Ko e “tamaio‘eiki” ‘oku fakafekau‘aki vāofi ia mo e Kulupu Pule ‘o e Kau Fakamo‘oni ‘a Sihová. ‘Okú ne tufaki ‘a e me‘akai fakalaumālie taimi totonu ki he kaungālotu kia Sihová. ‘Oku mau falala ki he tamaio‘eiki anga-tonu ko ení ke nau hanganaki ‘omai ‘emau “tokonaki me‘akai fe‘unga ‘i he taimi totonu.”​—Luke 12:42.

‘Okú ne tokanga‘i ‘a e fale ‘o e ‘Otuá. (1 Tīmote 3:15) Na‘e ‘oange ‘e Sīsū ki he tamaio‘eikí ‘a e fatongia mafatukituki ko hono tokanga‘i ‘a e ngāue ‘a e konga fakaemāmani ‘o e kautaha ‘a Sihová​—‘o tokanga‘i ‘a ‘ene ngaahi koloa fakamatelié, tataki ‘a e ngāue fakamalangá, pea ako‘i kimautolu fakafou ‘i he‘emau ngaahi fakataha‘angá. Ko ia ai, ke tokonaki mai ‘a e me‘a ‘oku mau fiema‘ú ‘i he taimi ‘oku mau fiema‘u aí, ko e “tamaio‘eiki anga-tonu mo potó” ‘okú ne tufaki ‘a e me‘akai fakalaumālié fakafou ‘i he ‘ū tohi ‘oku mau ngāue‘aki ‘i he‘emau ngāue fakafaifekaú, pehē foki ki he ngaahi polokalama ‘oku ‘omai ‘i he‘emau ngaahi fakatahá mo e ngaahi ‘asemipilií.

Ko e tamaio‘eikí ‘okú ne anga-tonu ki he ngaahi mo‘oni Fakatohitapú pea ki he ngāue kuo tuku mai ki ai ko hono malanga‘i ‘a e ongoongo leleí, pea ‘okú ne poto ‘i he fekau‘aki mo e founga ‘okú ne tokanga‘i fakapotopoto ai ‘a e ngaahi me‘a ‘a Kalaisi ‘i he māmaní. (Ngāue 10:42) ‘Oku tāpuaki‘i ‘e Sihova ‘a ‘ene ngāué ‘aki ‘a e tupu pea mo e ngaahi tokonaki fakalaumālie hulu fau.​—‘Aisea 60:22; 65:13.

• Ko hai kuo fakanofo ‘e Sīsū ke ne fafanga‘i fakalaumālie ‘ene kau ākongá?

• ‘I he ngaahi founga fē ‘oku anga-tonu mo poto ai ‘a e tamaio‘eikí?