Kakuceede buyo ciindi cisyoonto kuti afwe, Jesu wakabandika kumbali abasikwiiya bakwe bone—Petro, Jakobo, Johane, alimwi a Andreya. Ciindi Jesu naakali kusinsima kujatikizya ciyootondezya kubako kwakwe mumazuba akumamanino, wakabuzya mubuzyo uuyandika kapati wakuti: “Ino mubwini, nguni muzike uusyomeka alimwi uucenjede ooyo simalelaakwe ngwaakasala kulanganya babelesi bamuŋanda yakwe, kuti kabapa cakulya cabo aciindi ceelede?” (Matayo 24:3, 45; Marko 13:3, 4) Jesu wakali kusyomezya basikwiiya bakwe kuti mbwali ‘simalelaabo,’ wakali kuyoosala banoopa cakulya cakumuuya lyoonse kuli basikumutobela kumazuba aakumamanino. Ino ooyu muzike wakali kuyooba ni?

Nkakamu kasyoonto kabasikutobela Jesu bananike. “Muzike” ooyo lino Nkabunga Keendelezya ka Bakamboni ba Jehova. Ulaabila cakulya cakumuuya aciindi ceelede kuli baabo mbobakomba limwi Jehova. Tusyoma muzike uusyomeka ooyu kunootupa “cakulya cikkwene aaciindi ceelede.”—Luka 12:42.

Uleendelezya bamuŋanda ya Leza. (1 Timoteyo 3:15) Jesu wakapa muzike mukuli mupati wakweendelezya mulimo wacibeela caanyika cambunga ya Jehova—kulanganya lubono, kweendelezya mulimo wakukambauka, alimwi akutuyiisya kwiinda mumbungano zyesu. Aboobo, kutegwa atupe nzyotuyandika aciindi ceelede, “muzike uusyomeka alimwi uucenjede” ulaabila cakulya cakumuuya kwiinda mumabbuku ngotubelesya mumulimo wesu wakukambauka, alimwi amumakani aapegwa kumbungano akumiswaangano yesu mipati.

Muzike ulasyomeka kukasimpe kamu Bbaibbele alimwi akumulimo wakwe wakukambauka makani mabotu, alimwi ulicenjede kujatikizya mbwalanganya zintu zya Kristo anyika. (Milimo 10:42) Jehova ulaulongezya mulimo wamuzike kwiinda mukukwela bantu banji kuba bakamboni alimwi akumugwasya kwaabila cakulya cakumuuya cinji.—Isaya 60:22; 65:13.

• Ino nguni wakasalwa aa Jesu kuti kasanina basikwiiya bakwe kumuuya?

• Muunzila nzi muzike mwasyomeka alimwi akucenjela?