Antes mamatay hi Jesus, pribado nga nakiistorya hiya ha upat han iya mga disipulo—hira Pedro, Jakobo, Juan, ngan Andres. Samtang iginsusumat an tigaman han iya presensya ha kataposan nga mga adlaw, nagbangon hiya hin importante nga pakiana: “Hin-o gud ba an matinumanon ngan maaramon nga uripon nga gintaporan han Agaron ha paghatag hin pagkaon ha husto nga panahon ha iya mga surugoon ha panimalay?” (Mateo 24:3, 45, NW; Markos 13:3, 4) Ginpasarig ni Jesus an iya mga disipulo nga sugad nga ira “agaron,” magtutoka hiya hin magpapadayon ha pagtagana hin espirituwal nga pagkaon ha iya mga sumurunod durante han panahon han kataposan. Hin-o daw la an magkukompwesto hini nga uripon?

Usa ito ka gutiay nga grupo han dinihogan han espiritu nga mga sumurunod ni Jesus. An “uripon” amo an Nagmamando nga Lawas han mga Saksi ni Jehova. Ito an nagtatagana hin napapanahon nga espirituwal nga pagkaon ha ira mga igkasi-magsiringba kan Jehova. Nadepende kami hinin matinumanon nga uripon ha padayon nga pagtagana ha amon hin “igo nga pagkaon ha husto nga panahon.”—Lukas 12:42, NW.

Ito an nagdudumara han panimalay han Dios. (1 Timoteo 3:15) Iginhatag ni Jesus ha uripon an mabug-at nga responsabilidad ha pagdumara han mga buruhaton han organisasyon ni Jehova ha tuna—panginano han materyal nga mga panag-iya hito, pagpanguna ha pagsangyaw nga buruhaton, ngan pagtutdo pinaagi ha amon mga kongregasyon. Salit basi maihatag an amon ginkikinahanglan ha panahon nga kinahanglan namon ito, “an matinumanon ngan maaramon nga uripon” nagtatagana han espirituwal nga pagkaon pinaagi han mga publikasyon nga amon ginagamit ha ministeryo, ngan han mga programa ha mga katirok ngan mga asembleya.

An uripon matinumanon ha mga kamatuoran han Biblia ngan ha sugo nga pagsangyaw han maopay nga sumat, ngan maaramon ito ha pag-ataman han mga panag-iya ni Kristo dinhi ha tuna. (Buhat 10:42) Tungod han bendisyon ni Jehova ha mga pangalimbasog hito, damu an nakarawat han kamatuoran ngan hura nga nakakagtagana ito hin espirituwal nga pagkaon.—Isaias 60:22; 65:13.

• Hin-o an gintokahan ni Jesus ha pagtagana hin espirituwal nga pagkaon para ha iya mga sumurunod?

• Kay ano nga masisiring nga matinumanon ngan maaramon an uripon?