Ali asigele panandi kuwa, Yesu ŵatagulilene pacisyepela ni ŵakulijiganya ŵakwe mcece, Petulo, Yakobo, Yohane, soni Andileya. Yesu paŵasalaga ya cimanyilo ca kuŵapo kwakwe m’moŵa gambesi, ŵawusisye ciwusyo cakusosekwa mnope cakuti, “Menema ana nduni jwali jwa masengo [kapolo, NW] jwakulupicika ni jwalunda, jwele mbujegwe ŵambisile kuti awe kapitawo jwa anyamata ŵakwe, kuti ŵagaŵileje yakulya yawo pandaŵi jakwe?” (Matayo 24:3, 45; Maliko 13:3, 4) Yesu ŵasimicisyaga ŵakulijiganya ŵakwe kuti jwalakwe mpela ‘ambuje’ ŵawo, cacisagula ŵandu ŵane kuti ŵapeje ndaŵi syosope cakulya causimu ŵakumkuya ŵakwe mundaŵi jambesi. Ana ŵani ŵaŵasosekwaga kuŵa likuga lya kapololi?

Ali ŵakumkuya Yesu ŵasagulwe ni msimu yisyesyene. Kapoloju akusapeleka cakulya causimu ca pandaŵi jakwe kwa ŵakulambila Yehofa. Tukusajegamila kwa likuga lya kapolo jwakulupicika kuti ajendelecele kutupa ‘mbuwa ja cakulya ca pandaŵi jakwe.’—Luka 12:42.

Akusalolela nyumba ja Mlungu. (1 Timoteo 3:15) Yesu ŵalipele likuga lya kapolo masengo gamakulungwa mnope gakulolela masengo ga mbali ja pacilambo capasi ja likuga lya Yehofa, kulolela yindu ya likugali, kulongolela masengo gakulalicila, soni kutujiganya kupitila m’mipingo jetu. M’yoyo, kuti atupe pandaŵi jakwe yatukusosekwa, “kapolo jwakulupicika ni jwalunda” akugaŵa cakulya causimu kupitila m’mabuku gatukusakamulicisya masengo pakulalicila, soni kupitila m’misongano ja mpingo ni misongano jekulungwa.

Likuga lya kapolo likusakuya usyesyene wa m’Baibulo ni kutenda mwakulupicika masengo gaŵalipele gakulalicila ngani syambone, soni lili lyalunda pakusamalila yindu ya Klistu pacilambo capasi. (Masengo 10:42) Yehofa akukamucisya kuti ŵandu ŵajinji aŵe mboni syakwe, soni kulikamucisya likuga lya kapolo kuti lipeleceje cakulya causimu cejinji.—Yesaya 60:22; 65:13.

• Ana Yesu ŵamsagwile nduni kuti alisyeje ŵakumkuya ŵakwe mwa usimu?

• Ana kapolo ali jwakulupicika soni jwalunda m’matala gapi?