Tekila Yesu kafua, wusolula ayi minlongoki miandi minya—Petelo, Yakobi, Yoane, ayi Andele—va bawu veka kaka. Mu thangu kabe kuba kamba dimbu kiela monisa ti widi mu bilumbu bi tsuka, wuyuvusa kiuvu kiaki ki mfunu wombo ti ‘nani n’nanga wu kuikama ayi wu diela nioni mfumu andi kabikidi mu sunga bisadi binkaka muingi kaba vananga bidia mu thangu yifuana e?’ (Matayi 24:3, 45; Malako 13:3, 4) Yesu wube kamba minlongoki miandi ti niandi “mfumu” awu wela tula batu bobo bela tatamana kubavana bidia bi kipheve, yintia tuba nzayilu yi mambu ma Nzambi mu thangu yi tsuka. Na nioni nanga beni?

Badi mua kimvuka ki minlongoki mi Yesu bobo batululu mafuta. “Nanga” beni kiawu Kimvuka kintuadisi. N’nanga beni weta vana badiawu bisadi bi Yehova bidia bi kipheve mu thangu yifueni. Tueta tudila n’nanga wu kuikama beni ntima muingi katatamananga kutuvana “kuku kieto ki [bidia] mu thangu yifuani.”—Luka 12:42.

Beta tuadisa nzo yi Nzambi. (1 Timoteo 3:15) Yesu wuvana nanga beni kiyeko kinene ki tuadisa kisalu ki tini ki khubukulu yi Yehova va ntoto, yintia tuba tanina bima biandi bioso, tuadisa kisalu ki samuna, ayi kutulonga mu nzila yi bimvuka bieto. Diawu, muingi katuvana biobi tuidi mfunu mu thangu yo yifueni, “n’nanga wu kuikama ayi wu diela” lembo kabula bidia bi kipheve mu nzila yi minkanda mio tueta sadila mu kisalu ki samuna ayi mu nzila yi malongi mo tueta baka mu zikhutukunu zi kimvuka ayi zikhutukunu zinene.

Nanga beni widi wu kuikama mu malongi ma Bibila ayi mu kiyeko kio bamvana ki samuna nsamu wumbote. Widi phe diela mu phila yo keta tanina mu nduenga wombo bima bi Klisto va ntoto. (Mavanga 10:42) Yehova wulembo sakumuna kisalu ki nanga beni bila bawombo balembo ba zimbangi ziandi, ayi wulembo sadisa nanga beni mu bimisa bidia biwombo bi kipheve.—Yesaya 60:22; 65:13.

• Na nioni Yesu kabieka muingi kavananga bolongoki bandi bidia bi kipheve?

• Bila mbi tulenda tubila ti nanga widi wu kuikama ayi wu diele?