Le maʼ yaʼab u bin u kíimsaʼal Jesusoʼ, letiʼeʼ tsikbalnaj yéetel kantúul tiʼ u apostoloʼob: Pedro, Santiago, Juan yéetel Andrés. Le ka tu yaʼalaj Jesús le baʼaxoʼob kun eʼesik way yaan teʼ tu tsʼook kʼiinoʼobaʼ, letiʼeʼ tu beetaj le kʼáatchiʼaʼ: «¿Máax jach tu jaajil le palitsil chúukaʼan u yóol yéetel yaan u naʼat, tsʼaʼan tumen u Tsʼuulil yóokʼol uláakʼ palitsiloʼob utiaʼal ka u tsʼáa janal tiʼob jach tu yorailoʼ?» (Mateo 24:3, 45; Marcos 13:3, 4). Yéetel le tʼaanoʼobaʼ, Jesús le Tsʼuuloʼ, tu yaʼalaj jach yaan u tsʼáaik junmúuchʼ máakoʼob utiaʼal ka u tsʼáaʼob mantatsʼ le kaʼansaj ku keʼetel yéetel janal tiʼ le máaxoʼob tsaypachtik teʼ tu tsʼook kʼiinoʼobaʼ. ¿Máaxoʼob túuniʼ?

U chan múuchʼ máakoʼob yéeyaʼanoʼob ku tsaypachtikoʼob Jesús. Le «palitsiloʼ» letiʼe Cuerpo Gobernante tiʼ u j-jaajkunajoʼob Jéeobaoʼ. Ku tsʼáaik tu yorail le kaʼansaj ku keʼetel yéetel janal tiʼ le máaxoʼob meyajtik Jéeobaoʼ. Chéen letiʼe palitsil «tsʼáaik le bukaʼaj janal kʼaʼabéet[toʼon] jach tu yorailoʼ» (Lucas 12:42).

Ku kanáantik u yotoch Dios (1 Timoteo 3:15). Jesuseʼ tu pʼataj tiʼ le palitsil ka u kanáant le baʼaxoʼob yaan ichil u organización Jéeoba way Luʼumoʼ, ka u nuʼukt le kʼaʼaytaj bey xan ka u kaʼansoʼon teʼ múuchʼuliloʼoboʼ. Utiaʼal u tsʼáaiktoʼon le kaʼansaj kʼaʼabéettoʼon jach tu yorailoʼ, «le palitsil chúukaʼan u yóol yéetel yaan u naʼat[oʼ]», ku meyajtiʼ le jóoʼsaʼaniloʼob k-tsʼáaik teʼ kʼaʼaytajoʼ bey xan le baʼaxoʼob ku kaʼansaʼaltoʼon teʼ muchʼtáambaloʼob yéetel teʼ asambleaʼoboʼ.

Le «palitsiloʼ» chúukaʼan u yóol tumen ku kaʼansik jach le baʼaxoʼob yaan teʼ Bibliaoʼ yéetel táan u kʼaʼaytik le maʼalob péektsil jeʼex kʼubéentaʼabiktiʼoʼ, yéetel yaan u naʼat tumen ku kanáantik tubeel le baʼaxoʼob utiaʼal Cristo yaan way Luʼumoʼ (Baʼaxoʼob 10:42). Jéeobaeʼ táan u kiʼikiʼtʼantik le meyaj ku beetik le palitsiloʼ, lelaʼ ku beetik ikil u yaʼabtal u j-Jaajkunajoʼob bey xan ikil u tsʼáaik yaʼab kaʼansaj tiʼob (Isaías 60:22; 65:13).

• ¿Máax tu pʼataj Jesús utiaʼal ka u tsʼáa le kaʼansaj ku keʼetel yéetel janal tiʼ u tsaypachoʼoboʼ?

• ¿Baʼaxten ku yaʼalal chúukaʼan u yóol yéetel yaan u naʼat le «palitsiloʼ»?