Mu nshita ya Bena Kristu ba kubalilapo, abantu abanono, ‘abatumwa na bakalamba mu Yerusalemu,’ e bali mwi bumba litungulula ilyalepingula ifyo Abena Kristu basubwa bonse balekonka. (Imilimo 15:2) Pa kusuminishanya pa cintu cimo, balelanshanya ifyo Amalembo yalandapo, kabili balekonka ifyo umupashi walebatungulula ukucita. (Imilimo 15:25) Ifi fine e fyo ne Bumba Litungulula licita pali lelo.

Lesa alebomfya Ibumba Litungulula ku kucita ukufwaya kwakwe. Bamunyinefwe abasubwa ababa mwi Bumba Litungulula balibika sana amano ku Cebo ca kwa Lesa kabili balishiba sana ifyo umulimo wesu ufwile ukubombwa e lyo ne fya kucita pa fintu fimbi ifyakuma imipepele yesu. Balakumana cila mulungu ku kulanshanya ifyo aba bwananyina isonde lyonse balekabila. Nga filya fine cali mu nshiku sha batumwa, aba mwi Bumba Litungulula balatufunda Baibolo ukupitila mu makalata nelyo muli bakangalila benda e lyo na mu bantu bambi. Ici cilalenga abantu ba kwa Lesa ukwikatana no kulabombela pamo. (Imilimo 16:4, 5) Ababa mwi Bumba Litungulula e bangalila umulimo wa kwafwa abantu ukusambilila pali Lesa kabili balatukoselesha sana ukulashimikila pa Bufumu, e lyo e bangalila no mulimo wa kusonta abaume ababomba imilimo yalekanalekana mu filonganino.

Balakonka ifyo umupashi wa mushilo ubatungulula ukucita. Aba mwi Bumba Litungulula balakonka ubutungulushi bwa kwa Yehova, Mulopwe Uwapulamo, no butungulushi bwa kwa Yesu, Umutwe wa cilonganino. (1 Abena Korinti 11:3; Abena Efese 5:23) Tabaimona nge ntungulushi sha bantu ba kwa Lesa. Bena pamo na Bena Kristu abasubwa bambi, “bakonka Umwana wa mpaanga [Yesu] konse uko aya.” (Ukusokolola 14:4) Ababa mwi Bumba Litungulula balatasha sana pa mapepo tubapepelako.

• Ni bani baali mwi bumba litungulula mu nshita ya batumwa?

• Bushe Ibumba Litungulula pali lelo likonka shani ifyo Lesa alitungulula ukucita?