An san kɛmɛ fɔlɔ la, “Jerusalɛm cidenw ani a diinɛ maakɔrɔw” lajɛlen tun ye ɲɛmɔgɔ kulu ye, a tun bɛ ten cogo la ka d’a kan o waati la, ko minnu tun ka kan ka latigɛ ni o bɛ krecɛnw mulenw kan, olu de tun bɛ o latigɛ. (Kɛwalew 15:2) Walisa ka se ka ko dɔ latigɛ u bɛɛ tun bɛ bɛn fɛn kelen de kan. U tun bɛ se ka o kɛ ka d’a kan u tun bɛ Sɛbɛnw sɛgɛsɛgɛ ani u tun b’a to Ala ka hakili senu ka u ɲɛminɛ. (Kɛwalew 15:25) Bi fana, ɲɛmɔgɔ kulu b’o kelen de kɛ.

Krecɛn kulu don Ala bɛ baara kɛ ni min ye walasa k’a sago kɛ. Krecɛnw mulenw minnu bɛ ɲɛmɔgɔ kulu kɔnɔ, Ala ka kuma ka di olu ye kosɛbɛ. Dɔnniyaba bɛ u la ka ɲininkaliw ɲɛnabɔ minnu bɛ an ka ɲɛnamaya ani diinɛ kan. Ɲɛmɔgɔ kulu bɛ lajɛ dɔgɔkun o dɔgɔkun walasa Jehova Seerew magoɲɛfɛnw ye fɛn minnu ye diɲɛ bɛɛ kɔnɔ, ka olu sɛgɛsɛgɛ. I n’a fɔ an san kɛmɛ fɔlɔ, u bɛ bilasiraliw di minnu sinsinnen bɛ Bibulu kan, u bɛ o kɛ lɛtɛrɛw walima kafo lakɔlɔsibaga taamakɛlaw sababu fɛ walima cogoya wɛrɛw fɛ. O b’a to hakilina ani kɛwalew kelen bɛ kɛ Ala ka jamakulu la. (Kɛwalew 16:4, 5) Ɲɛmɔgɔ kulu bɛ dusudon mɔgɔw kɔnɔ u ka waajuli kɛ ani a b’a mago don dumuni labɛnni na hakili ta fan fɛ ani a bɛ i janto jɔyɔrɔ diw la balimakɛw ma.

Krecɛn kulu don min b’a to Ala ka hakili senu ka u ɲɛminɛ. Ɲɛmɔgɔ kulu bɛ Jehova ka ɲɛminɛ ɲini, o min ye dunuya bɛɛ Masaba ye, ani Yesu o min ye jɛkulu ɲɛmɔgɔ ye. (1 Kɔrɛntekaw 11:3; Efesekaw 5:23) A kɔnɔ mɔgɔw tɛ u yɛrɛ filɛ i n’a fɔ Ala ka jamakulu kuntigi ye. U ni krecɛn mulen tɔw faralen ɲɔgɔn kan “sagaden bɛ taa yɔrɔ o yɔrɔ, olu bɛ tugu a nɔfɛ.” (Jirali 14:4) Ɲɛmɔgɔ kulu b’a ka waleɲumandɔn jira ka ɲɛsin an ka deliliw ma, an bɛ minnu kɛ u ye.

• An san kɛmɛ fɔlɔ la, Ɲɛmɔgɔ kulu mɔgɔw tun ye jɔn ye?

• Bi bi in na, Ɲɛmɔgɔ kulu bɛ Ala ka ɲɛminɛ ɲini cogo di?