I bas abad pemena, sada terpuk kitik ’rasul-rasul ras pertua-pertua i Jerusalem’ ngelayani jadi badan pinpinen si erban keputusen penting mewakili kerina runggun kalak Kristen si iminaki. (Perbahanen Rasul-Rasul 15:2) Kalak e sada katana i bas erbahan keputusen kenca mpegermetken kai si ikataken Pustaka si Badia ras ngikutken kepkepen kesah si badia. (Perbahanen Rasul-Rasul 15:25) Contoh si bage rupana niikuti gundari.

Ipake Dibata Lako Ndalanken PeratenNa. Senina-senina si iminaki si jadi Badan Pinpinen enda ncikep Kata Dibata alu nteguh janah erpengalamen kal i bas ngelakoken tugas-tugas rohani ntah pe dahin sideban. Kalak enda pulung tep-tep minggu guna ngerungguken keperlun senina-senina sada kiniteken i belang-belang doni. Bagi i bas abad pemena, pengajaren erpalasken Pustaka si Badia ipeseh alu surat, arah pertua keliling ras cara sidebanna. Enda erbahan umat Dibata banci sendalanen i bas perukuren ras perbahanen. (Perbahanen Rasul-Rasul 16:4, 5) Badan Pinpinen ngawasi gelahna pangan rohani banci isediaken, nggiatken dahin lako mberitaken Kinirajan, ras ngawasi penangkuhen senina-seninanta si ndalanken tanggung jabap.

Patuh kempak kepkepen kesah si badia. Badan Pinpinen mindo kepkepen Jahwe, Dibata si Ngkuasai si Nasa Lit, ras Jesus, Takal Perpulungen. (1 Korinti 11:3; Epesus 5:23) Anggota-anggota Badan Pinpinen labo iakapna ia peminpin umat Dibata. Kalak enda, bage pe kerina kalak Kristen si iminaki, terus ”iikutkenna Anak Biri-Biri e [Jesus] ku ja gia Ia lawes”. (Ketangkasen 14:4) Seh kal mehergana iakap Badan Pinpinen adi kami notoken kalak e.

• Ise saja anggota badan pinpinen abad pemena?

• Alu cara uga Badan Pinpinen jaman modern mindo penampat Dibata?