Del primer siglo, tiene un diutay grupo ‘na Jerusalem del maga apostol y maga anciano’ quien ta sirvi como el cuerpo gobernante. Sila el quien ta hace maga importante decicion por parte del entero congregacion de maga iscujido Cristiano. (Maga Actividad 15:2) Cay ta sigui sila asegun na Escritura y guia del espiritu del Dios, tan uyun sila na diila decicion. (Maga Actividad 15:25) Ansina tambien ahora.

Ta usa kanila el Dios para hace el de suyu voluntad. El maga iscujido hermano quien ta sirvi como el Cuerpo Gobernante interesao gayot na Palabra del Dios y mucho experiencia na organizacion y espiritual cosas. Cada semana, tan miting sila para discuti si cosa el necesidad del maga hermano y hermana na entero mundo. Igual del primer siglo, ta dale sila maga instruccion que basé na Biblia por medio de carta, na maga traveling overseer y otro pa. Este ta ayudá para queda unido el pensamiento y accion del maga siervo del Dios. (Maga Actividad 16:4, 5) El Cuerpo Gobernante amo el quien ta mira con el preparacion del espiritual comida, ta anima con todo queda activo na trabajo predicacion y ta mira tambien na iscujida del maga hermano quien hay guiá na congregacion.

Ta sigui sila na guia del espiritu del Dios. El Cuerpo Gobernante ta depende na guia de Jehova, el Soverano del universo y con Jesus, el Cabeza del congregacion. (1 Corinto 11:3; Efeso 5:23) El maga miembro de este gendeh ta trata con el diila mismo cuerpo como maga lider del maga siervo del Dios. Sila y el otro pa maga iscujido Cristiano, “amo aquellos quien ta sigui con el Carnero [Jesus] maskin donde Le ta anda.” (Revelacion 14:4) El Cuerpo Gobernante ta aprecia gayot si ta inclui kita kanila na diaton rezo.

• Quien el maga miembro del cuerpo gobernante del primer siglo?

• Paquemodo el Cuerpo Gobernante ta sigui na guia del Dios ahora?