Yaʼ ti ñaxam bʌ siglo, junmojt «jini apóstolob yicʼot jini ancianojob» yaʼ bʌ añob ti Jerusalén, tsiʼ chaʼleyob eʼtel bajcheʼ Junmojt muʼ bʌ i pʌsob bij, chaʼan miʼ qʼuelob chuqui yom miʼ melob chaʼan i wenlel jini xñoptʼañob bombiloʼ bʌ yaʼ bʌ añob ti congregación (Hechos 15:2). Come miʼ wen pejcañob jini tsʼijbujel yicʼot tsiʼ meleyob chuqui tsaʼ aqʼuentiyob i ñaʼtan ti chʼujul bʌ espíritu, jin chaʼan tsiʼ ñaʼtayob chuqui yom miʼ melob (Hechos 15:25). Cheʼʌch miʼ mejlel jaʼel ili ora.

Jiñʌch muʼ bʌ i cʼʌn Dios chaʼan miʼ mel chuqui yom. Jini lac quermañojob woliyoʼ bʌ ti eʼtel bajcheʼ Junmojt muʼ bʌ i pʌsob bij bombiloʼ bʌ, miʼ wen qʼuelob ti ñuc i Tʼan Dios yicʼot wen yujilob i melol i yeʼtel tiʼ chaʼan bʌ Jehová yicʼot yan tac bʌ eʼtel. Ti jujumpʼejl semana, junsujtel miʼ tempañob i bʌ chaʼan miʼ qʼuelob bajcheʼ yilal añob i yermañojob tiʼ pejtelel pañimil. Lajal bajcheʼ ti ñaxam bʌ siglo, miʼ yʌlob chuqui mi caj i mejlel chucbil bʌ ti Biblia, an i tajol miʼ yʌcʼob ti cʌñol ti jumpʼejl carta, muʼ bʌ i julaʼtañob congregación o miʼ cʼʌjñel yambʌ hermanojob. Cheʼ lajal chuqui miʼ ñaʼtañob yicʼot muʼ bʌ i melob tiʼ yorganización Dios, miʼ coltañob chaʼan temel miʼ yajñelob (Hechos 16:4, 5). Jini Junmojt muʼ bʌ i pʌsob bij, miʼ qʼuelob chaʼan miʼ mejlel cʌntesa lajal bʌ bajcheʼ bʌlñʌcʼʌl, miʼ chaʼlen coltaya jaʼel chaʼan miʼ qʼuejlel ti ñuc jini subtʼan yicʼot miʼ qʼuel mi weñʌch chaʼan juntiquil hermano miʼ waʼchocontel tiʼ yeʼtel yaʼ ti congregación.

Miʼ melob chuqui miʼ yʌqʼuentelob i ñaʼtan ti jini chʼujul bʌ espíritu. Jini Junmojt muʼ bʌ i pʌsob bij, miʼ tsajcañob majlel jini Ñuc bʌ i yeʼtel ti panchan yicʼot ti Pañimil, Jehová, yicʼot i Jol congregación, Jesús, chaʼan miʼ melob muʼ bʌ i subentelob (1 Corintios 11:3; Efesios 5:23). Yujilob chaʼan mach jinic muʼ bʌ i chaʼleñob xicʼoñel yaʼ tiʼ tejclum Dios. Lajal bajcheʼ jini yambʌ xñoptʼañob bombiloʼ bʌ jaʼel, «miʼ tsajcañob jini Tiñʌmeʼ [Jesús] baqui jach miʼ majlel» (Apocalipsis 14:4). Jini Junmojt muʼ bʌ i pʌsob bij, miʼ qʼuelob ti ñuc cheʼ mi laj cʼajtin ti oración chaʼan miʼ coltʌntelob.

• ¿Majquiyob jini Junmojt muʼ bʌ i pʌsob bij ti ñaxam bʌ siglo?

• Jini Junmojt muʼ bʌ i pʌsob bij wʌle ora, ¿bajcheʼ miʼ melob chuqui yom bʌ Dios?