O ńo̱ṅo̱n a boso dibo̱to̱ disadi la “bamuloloma na batudu” o Yerusalem nde ba ta dibe̱le̱ di madie̱le̱ o ni ponda. Babo̱ nde ba ta ba no̱ngo̱ bedomsedi ba mweńa jombwea myemba me̱se̱ ma Kriste̱n yo̱kisabe̱. (Bebolo 15:2) Ba ta bombwea nje betiledi be makwalano̱ na jese̱le̱ ná mudī ma Loba mu die̱le̱ babo̱ o bedomsedi bá mano̱ngo̱no̱. (Bebolo 15:25) Mulemlem m’eyembilan pe̱ nde di be̱nno̱ we̱nge̱.

Loba a mabolane̱ babo̱ o bola Jemea lao. Dibe̱le̱ di Madie̱le̱ di mombwea na ńo̱ngi ninde̱ne̱ ne̱ni ebolo e madangwano̱, na no̱ngo̱ pe̱ bedomsedi jombwea mambo ma mudī. Woki te̱ ngedi po̱, ba mako̱to̱me̱ o jombwea mambo ma mapule̱ ońola bonasango o wase ńe̱se̱. Kana o ńo̱ṅo̱n a boso, bedomsedi ba mano̱ngo̱no̱ tongwea na belēdi ba Bibe̱l, ba maloma mo̱ o myemba tongwea na maleta to̱so̱ na baboledi ba ebondo. Nika e mongwane̱ ná di be̱ moto mō̱ o mo̱nge̱le̱ na o mabola. (Bebolo 16:4, 5) Dibe̱le̱ di Madie̱le̱ nde di mombweye̱ mboṅsan má da la mudī, jome̱le̱ ońola ebol’a dikalo, na po̱so̱ bonasango ba madie̱le̱ mwemba.

Ba mese̱le̱ ná mudī ma Loba mu die̱le̱ babo̱. Dibe̱le̱ di Madie̱le̱ le nde owas’a bediedi ba Mwanedi Ńasam, Yehova, na Yesu ńe mulopo ma mwemba. (1 Korinto 11:3; Efeso 5:23) Ba si malanga babo̱me̱ne̱ ka mulopo ma tumba la Loba. Mulatako na yine̱ kriste̱n yo̱kisabe̱, “ba mabupe̱ mun’a mudo̱ngi to̱ we̱ni a malano̱.” (Bebīsedi 14:4) Ba bonasango ba mabwa muńe̱nge̱ ke̱ di makane̱ ońol’abu.

• Nja nu ta dibe̱le̱ di madie̱le̱ o ńo̱ṅo̱n a boso e?

• Ne̱ni Dibe̱le̱ di Madie̱le̱ di mawasano̱ bediedi ba Loba e?