Asomafo no hɔn aber do no, nyimpakuw ketseaba bi soom dɛ akwankyerɛ kuw. Iyinom nye ‘asomafo no nye mpanyimfo a nna wɔwɔ Jerusalem’ no, na hɔn na wosisii gyinae ahorow, ma ɔdze mfaso brɛɛ asafo ahorow a Christianfo a wɔasera hɔn wɔ mu no. (Ndwuma 15:2) Ɔyɛ Kyerɛwnsɛm no a wosusũu ho, nye Nyankopɔn no sunsum no akwankyerɛ a wodzii ekyir na wogyinaa do sisii gyinae ahorow no. (Ndwuma 15:25) Dɛm nhwɛdo kor yi ara na Akwankyerɛ Kuw a ɔwɔ hɔ ndɛ no dzi ekyir.

Nyankopɔn dze no dzi dwuma ma n’apɛdze yɛ hɔ. Enuanom mbarimba a wɔasera hɔn a wɔwɔ Akwankyerɛ Kuw no mu no enyi gye Nyankopɔn Asɛm ho yie paa. Wɔwɔ suahũ pii wɔ mbrɛ wosisi ɔkwan a ɔsɛ dɛ yɛfa do yɛ hɛn som edwuma no ho gyinae, nye mbrɛ wobua ɔsom ho nsɛmbisa ahorow no mu. Wohyia mu dapɛn biara susũ wiadze nyina enuayɛ kuw no ehiadze ho. Dɛ mbrɛ nna ɔtse wɔ asomafo no aber do no, wɔnam nkrataakyerɛw, ahwɛfo akwantufo nye akwan afofor do dze akwankyerɛ a ogyina Bible do ma. Iyi ma Nyankopɔn nkorɔfo yɛ kor wɔ hɔn nsusui nye hɔn ndzeyɛɛ mu. (Ndwuma 16:4, 5) Akwankyerɛ Kuw no na ɔhwɛ ma wosiesie sunsum afamu edziban, ɔhyɛ hɛn nyina nkuran ma yɛdze Ahendzi asɛmpakã edwuma no dzi kan wɔ hɛn asetsena mu, na ɔhwɛ ma wɔpaw enuanom mbarimba dze asodzi hyehyɛ hɔn nsa wɔ asafo no mu.

Odzi akwankyerɛ a Nyankopɔn sunsum dze ma no do. Akwankyerɛ Kuw no hwehwɛ akwankyerɛ fi Jehovah, Amansan Hen no nye Jesus a ɔyɛ asafo no ne Tsir no hɔ. (1 Corinthfo 11:3; Ephesusfo 5:23) Akwankyerɛ Kuw no munyi biara mmbu noho dɛ ɔyɛ Nyankopɔn no nkorɔfo do ɔkwankyerɛfo. Hɔn, nye Christianfo a wɔasera hɔn no nyinara ‘dzi Eguambaa [Jesus] no ekyir wɔ beebiara a ɔkɔ.’ (Nyikyerɛ 14:4) Akwankyerɛ Kuw no enyi sɔ mpaa a yɛbɔ ma hɔn no.

• Woananom na wɔsomee dɛ akwankyerɛ kuw no mufo wɔ asomafo no aber do?

• Ebɛn kwan do na Akwankyerɛ Kuw a ɔwɔ hɔ ndɛ no hwehwɛ akwankyerɛ fi Nyankopɔn hɔ?