Cicili kilisiti niba yogunu bi tondiba leni bi nikpeliba n den ye Jelusalema ki tie li gobiditaanli liiga yaaba cagili. Laa cagibiga niba den taandi a jaga bi nigagidikaaba kuli yeli po. (Jesu Tondiba Tuona 15:⁠2) Bi yaa den bua ta li yanjagili, bi den lingi biibili n yedi yaala, ki mia U Tienu fuoma todima, ki di yuandi ta laa yanjagili. (Jesu Tondiba Tuona 15:⁠25) Dinli-​dinla, li gobiditaanli liiga yaaba cagili ŋua yene.

Bi tie yaa niba ke U Tienu gandi o yanbuama po. Bi nigagidikaaba yaaba n tie li gobiditaanli liiga yaaba cagili ŋanbi bua U Tienu maama. Bi go pia mi banma ke li todi-​ba ke bi diidi u laabaaliŋamo kpaanma tuonli, leni ti gobiditaanli tuonli toaba. Danalele kuli bi taagi diidi ban baa fidi tieni yaala ki todi Jeova Siedinba yaaba n ye ŋanduna kuli nni. Ban bua ti kpiiba n ba yaa yanjaga n ñan biibili nni, bi dangi laa yanjaga a tila nni. Bi tendi laa tila li nitaancianli goandikaaba ke bi cogi bi niba kuli po, nani lan den tiendi maanma a cicili kilisiti niba yogunu yeni. Lani kuli cedi ke U Tienu niba taagi se li dandanli nni ke li pa. (Jesu Tondiba Tuona 16:​4, 5) Li gobiditaanli liiga yaaba cagili tundi-​ti ke tin yaa caa liiga u laabaaliŋamo kpaanma nni. Bi moandi puuni-​ti li dandanli jiema, bi go gandi yaaba n baa fidi ga liiga ki soani li tuonli ti taana nni.

Bi tie yaa niba n tuodi U Tienu fuoma gobidima. Li gobiditaanli liiga yaaba cagili lingi Jeova ŋanduna kuli tagido, leni Jesu li nitaanli yudaano gobidima. (Korenti Yaaba Tikpiali 11:⁠3; Efesi Yaaba 5:⁠23) Baa nua ke bi tie U Tienu niba canbaanba ka ba. Bani leni nigagidikaaba toaba “ŋua ki Pebiga (Jesu) wan caa naani kuli”. (Mi Doagidima 14:⁠4) Li gobiditaanli liiga yaaba cagili tuondi-ti, tin jaandi Jeova bipo yeni.

• Cicili kilisiti niba yogunu ŋme n den tie li gobiditaanli liiga yaaba cagili?

• Li gobiditaanli liiga yaaba cagili lingi U Tienu gobidima lede?