Meserewondo etenga, okambumba okaṱiṱi “kovaapostele novatarere vombongo,” aave kuramene po ovatwirisiwa mozombongo azehe nu aave ungura otjorutu orunane okutoora ozondando ozonanḓengu nḓaaze heperwa po. (Oviungura 15:2) Owo tji va toora ondando ku mave zuvasana avehe, ya ri mena rokutja rutenga aave hungirire kokutja Omatjangwa maye tja vi, okuzambo ave kongorere omahongorero wombepo yaMukuru. (Oviungura 15:25) Imbwi oomuano mbu kayenda po ndino wina.

Orutu Orunane ru ungurisiwa i Mukuru okutjita ombango ye. Ovarumendu ovatwirisiwa mbe ri mOrutu Orunane va suvera Embo raMukuru tjinene nu ve nondjiviro ndja yenena okututyera po kutja oviungura vyetu mavi sokuungurwa vi poo okuzira omapuriro nge notjiṋa noupanga wetu na Mukuru. Owo ve kara nombongarero otjivike atjihe okutara kovihepwa vyOvahongonone vaJehova mouye auhe. Otja tji pa ri meserewondo etenga, Orutu Orunane ru yandja omirari okuza mOmbeibela okupitira motutuu poo movatarere mbe varura ozombongo na varwe. Ihi tji tjita kutja otjiwaṋa tjaMukuru atjihe tji ripure nokutjita oviṋa moruwano. (Oviungura 16:4, 5) Orutu Orunane ru tarera omarongerisiro wovikurya vyombepo, ru yanḓiparisa ovakambure avehe kutja ve yandje ombango tjinene koviungura vyokuzuvarisa nu ru hongorera omazikiro wovanene novavatere vombongo.

Orwo ru hongorerwa i ombepo yaMukuru. Orutu Orunane ru tara ku Jehova ngu ri owOkombandambanda mouye auhe na ku Jesus ngu ri Otjiuru tjombongo kutja ve ve hongorere. (1 Ovakorinte 11:3; Ovaefese 5:23) Ouṋepo wOrutu Orunane kau rivara otjovanane votjiwaṋa tjaMukuru. Nungwari owo pu nOvakriste avehe ovatwirisiwa “ve kongorera Ondjona ngamwa akuhe ku mai i.” (Omavandururiro 14:4) Ouṋepo wOrutu Orunane u nyaṋuka tjinene indu tji matu ve kumbire nokukumbira oviungura vyawo.

• Oowaṋi mba ri morutu orunane rweserewondo etenga?

• Orutu Orunane ndino ru paha vi omuhunga okuza ku Mukuru?