Jesús nayaímpiniam wakétkimia nuyanka, Kristu aents ármiania nuka mashi nayaímpiniam wéartin ármiayi. Tura mátsatkamu Jerusalénnumka Kristu aentsun wainin nuyá apóstoles irúnmiayi. Niinkia anáiramu asar Kristu aentsu irúntramurin warinkish chicham ákuinkia, iruntrar Yuús Papiín ámamkesar unuimiatrar Yuusan seawár chichaman iwiarin ármiayi (Túramu [Hechos] 15:2, 25). Yamaisha aents nayaímpiniam wéartincha írunui. Tura nunianak, Testigos de Jehová takatrín irúnturar chichamprúkarat tusa Yuús ishichik aentsnak anáiraiti.

Wi wakéramun umirtúkarat tusa Jehová anáiraiti. Testigos de Jehová takatrín irúnturar chichamprin áiniaka Yuusa chichame tana nuna ámamkesar ti unuimiatin asar nekasa nuna jintínkratin áiniawai. Tura aintsank, tuke atsakámutin irúntramunmasha tura untsurí tuakmánumsha waríniuna jintínkratatniuit nunasha chichamprin áiniawai. Nuyá papií Yuusna áujmatainian sukartin áiniawai. Yuusa chichame itiúr pénker etsérkatniuit nunasha chichamprin áiniawai. Tura warínmanksha yaímkiatin ya anáikiamu árminiait nunasha iin áiniawai. Nuyá ashí nunkanam ni yachí, ni umaí, wariniak utsumainia tusar tuke miércolestin iruntrar áujmatin áiniawai. Nuna túrawar, papiín aatrar akuptin áiniawai. Tura Testigos de Jehová irúntramurin jintínkratawarat tusar, wekás iíkratin ainian akupin áiniawai. Nuna túruiniakui, ashí nunkanam Testigos de Jehová métekrak enentaimsar takákmainiawai (Túramu [Hechos] 16:4, 5).

Pénker takákmastasar Jehován seawár takakma áiniawai. Testigos de Jehová takatrín irúnturar chichamprin áiniaka, Jehován seainiak, ame takatrum pénker najánatin yaínkratkata tinia takakmau áiniawai. Núnisank, Jesúsnaka Kristu aentsu uúntrinti tiniu áiniawai (1 Kurintiunam 11:3; Ipisiunam [Efesios] 5:23). Kristu aentsun akúpniuitjiai tu enentaimcha áiniawai. Antsu Jesukristu ii uúntrinti tusar umirín áiniawai (Apukarípsis 14:4). Pénker takákmasarat tusar Yuús seatam shiir nekapín áiniawai.

• Yaúnchuksha Kristu aentsu irúntramurin ya chichamprin armia?

• Yamaisha Testigos de Jehová takatrín irúnturar chichamprin ainia, itiúrkara pénker takákmainia?