Ĩvinda ya atũmwa, kĩkundi kĩnini kya ‘atũmwa na atumĩa ala maĩ Yelusaleme,’ nĩkyo kyaĩ nzama ĩla ĩtongoesye, nayo nĩyo yeekaa motwi maito kwondũ wa Aklĩsto onthe etĩkĩw’a mauta. (Meko ma Atũmwa 15:2) Ĩla nzama ĩsu yaneenea Maandĩko ĩtongoew’e nĩ veva mũtheu, nĩyavikĩaa ũtwi ũmwe. (Meko ma Atũmwa 15:25) Nzĩa ĩsu no yo ĩtũmĩawa ũmũnthĩ.

Nzama ĩsu nĩtũmĩawa nĩ Ngai kwĩka kwenda kwake. Ana-a-asa etĩkĩw’a mauta ala me nthĩnĩ wa Nzama Ĩla Ĩtongoesye nĩmendeeaw’a mũno nĩ Ndeto ya Ngai na me na ũmanyi mwingĩ wa kũsũngĩa makũlyo makonetye ndĩni na kũtw’a ũndũ wĩa witũ waĩle kwĩkwa. Nzama ĩsu ĩkomanaa kĩla kyumwa nĩ kana ĩsũanĩĩe mavata ma ana-a-asa ĩũlũ wa nthĩ yonthe. O ta ĩvinda ya atũmwa, myolooto yosanĩte na Mbivilia nĩnenganawe kwĩsĩla mavalũa, asyaĩĩsya ma kũthyũlũlũka, na nzĩa ingĩ. Ũu ũtumaa andũ ma Ngai mesilya na kwĩka maũndũ me na ũũmwe. (Meko ma Atũmwa 16:4, 5) Nzama Ĩla Ĩtongoesye nĩyĩũngamĩaa kũseũvw’a kwa lĩu wa kĩveva, kũnyuvwa kwa ana-a-asa kwondũ wa kwĩanĩsya mawĩa mana, na nĩyĩkĩaa onthe vinya matongosye wĩa wa kũtavany’a ĩũlũ wa Ũsumbĩ.

Nzama ĩsu nĩyĩtĩkĩlaa kũtongoew’a nĩ veva wa Ngai. Nzama Ĩla Ĩtongoesye ĩmwĩkwatasya Mũsumbĩ Ũla Mũnene Vyũ, Yeova, na Mũtwe wa kĩkundi, Yesũ, mamĩtongoesye. (1 Akolintho 11:3; Aeveso 5:23) Ala me nthĩnĩ wa nzama ĩsu mayĩtusaa ta ndongoi sya andũ ma Ngai. Mo vamwe na Aklĩsto etĩkĩw’a mauta onthe, “mavikĩlaa Katena ka ĩlondu [Yesũ] o vala ũendaa.” (Ũvuan’yo 14:4) Nzama Ĩla Ĩtongoesye nĩtanĩthaw’a nĩ mboya ila tũvoyaa kwondũ wayo.

• Naaũ ala maĩ nzamanĩ ĩla ĩtongoesye ĩvinda ya atũmwa?

• Nzama Ĩla Ĩtongoesye ũmũnthĩ yonanasya ata nĩyĩatĩaa ũtongoi wa Ngai?