Ha ka spah snem banyngkong, ka kynhun barit, “ki apostol bad ki tymmen basan” ha Jerusalem, ki shakri kum ka kynhun pynïaidkam ban rai na ka bynta ka balang Khristan ba la pynsleh baroh kawei. (Kam 15:2) Ka jingïamynjur lang ïa kano kano ka rai ka dei namar ba ki la ïamir jingmut lang na ka Ktien U Blei bad lyngba ka jingpynïaid u mynsiem bakhuid. (Kam 15:25) La bud ïa kajuh ka nuksa mynta ruh.

La pyndonkam da U Blei ban leh ïa ka mon jong u. Kito kiba la pynsleh kiba don ha ka Kynhun Pynïaidkam ki ieid bha ïa ka Ktien U Blei bad ki nangbha ban rai kumno ban pynïaid ïa ki kam bakynja mynsiem. Ki ïakynduh man la ka taïew ban ïa kren halor ki jingdonkam ki para bangeit ha satlak ka pyrthei. Kum ha ka spah snem banyngkong, ki ai jingbthah na ka Baibl lyngba ki shithi ne ki nongsharai ba wan khmih ne kiwei de. Kane ka ïarap ïa ki briew jong U Blei ban ïatyllilang ha ki kam bad ha ki jingmut jingpyrkhat. (Kam 16:4, 5) Ka Kynhun Pynïaidkam ka pynkhreh ïa ka jingbam bakynja mynsiem bad ka pynshlur ïa baroh ban shim khia ïa ka kam ïalap. Ka peit ruh ïa ka kam ban thung ïa kito kiban kitkhlieh ïa kiwei kiwei de ki kam.

Ki bud ïa ka jingïalam u mynsiem bakhuid jong U Blei. Ka Kynhun Pynïaidkam ka peit sha U Jehobah uba ha Khlieh tam eh bad sha U Jisu, u Khlieh jong ka balang ban ïalam ïa ki. (1 Korinth 11:3; Ephesos 5:23) Ki dkhot jong ka kim ju ñiew ïalade kum ki nongïalam jong ki briew U Blei. Ma ki lem bad baroh ki Khristan ba la pynsleh ki “bud ia uta U Khun langbrot [Jisu] kat shaba u leit.” (Jingpynpaw 14:4) Ka Kynhun Pynïaidkam ka sngewnguh lada ngi duwai na ka bynta jong ki bad ka kam jong ki.

• Mano ba don ha ka kynhun pynïaidkam ha ka spah snem banyngkong?

• Kumno ka Kynhun Pynïaidkam mynta ka wad jingïarap na U Blei?