Muna tandu kiantete, e buka kiakete kia ‘ntumwa ye mbuta muna Yerusaleme’ yau bakala mu buka kia selo yambuta ye babakanga nzengo zamfunu muna wete dia Akristu awonso akuswa muna nkutakani. (Mavangu 15:2) Bafimpanga e Sono ya Nkand’a Nzambi yo yambula vo mwand’a Nzambi wabafila muna konso nzengo babakanga. (Mavangu 15:​25) I diau mpe divangamanga o unu.

Besadilwanga kwa Nzambi mu vanga luzolo lwandi. Ampangi za kuswa ana besalanga se Selo Yambuta betoma yangalelanga Diambu dia Nzambi, bavuidi umbakuzi wafwana mu singika mambu ma mwanda ye mankaka. Bekutakananga konso lumingu mu badika mambu mavuilu o mfunu kwa nkangu a Yave mu nza yawonso. Nze una wavangamanga muna tandu kiantete, e Selo Yambuta o unu bevananga luludiku lwa Nkand’a Nzambi, besonekanga nkanda yo sadila akengi a zunga ye akaka muna sadisa ampangi. Ediadi disadisanga nkangu a Nzambi mu kala ye kintwadi muna ngindu ye muna mavangu. (Mavangu 16:​4, 5) Buka kia Selo Yambuta befilanga e salu kia kubika madia ma mwanda, bekasakesanga mpangi zawonso mu sia salu kia samuna nsangu zambote za Kintinu va fulu kiantete, tumba kikengi kwa ampangi balenda tambula kiyekwa muna nkubik’a Yave.

Befilwanga kwa mwanda Nzambi. E Selo Yambuta belandanga luludiku lwa Yave wa Mfumu a Nz’amvimba yo Yesu una vo i Ntu muna nkutakani. (1 Korinto 11:3; Efeso 5:​23) Ke bekuyibadikilanga ko vo yau i mfumu vana vena nkangu a Nzambi. Selo Yambuta kumosi ye Akristu awonso akuswa, “belandang’o Mwan’ememe [Yesu] konso kuna kekwenda.” (Lusengomono 14:⁠4) Selo Yambuta beyangalelanga e sambu tuvanganga muna wete diau mu kuma kia salu besalanga.

• Aki nani bakala muna buka kia selo yambuta muna tandu kiantete?

• Aweyi Selo Yambuta belemvokelanga luludiku lwa Nzambi o unu?