ບົດທີ 20
ຄະນະກຳມະການປົກຄອງເຮັດວຽກແນວໃດໃນທຸກມື້ນີ້
ຄະນະກຳມະການປົກຄອງໃນສະຕະວັດທຳອິດ
ອ່ານຈົດໝາຍຈາກຄະນະກຳມະການປົກຄອງ
ໃນສະຕະວັດທຳອິດ ກຸ່ມຄົນນ້ອຍ ໆ ທີ່ປະກອບດ້ວຍ “ພວກລາຊະທູດ [ອັກຄະສາວົກ] ແລະຜູ້ເຖົ້າແກ່ທັງຫຼາຍທີ່ເມືອງເຢຣຶຊາເລມ” ປະກອບເປັນຄະນະກຳມະການປົກຄອງເພື່ອເຮັດການຕັດສິນໃຈທີ່ສຳຄັນແທນປະຊາຄົມຄລິດສະຕຽນທັງໝົດທີ່ໄດ້ຮັບການເຈີມ. (ກິດຈະການ 15:2) ເຂົາເຈົ້າເຮັດການຕັດສິນໃຈຢ່າງເປັນເອກະພາບກັນໄດ້ໂດຍການປຶກສາຫາລືກັນຕາມສິ່ງທີ່ພະຄຳພີກ່າວແລະຕິດຕາມການຊີ້ນຳຈາກພະວິນຍານຂອງພະເຈົ້າ. (ກິດຈະການ 15:25) ດັ່ງນັ້ນ ໃນທຸກວັນນີ້ກໍໄດ້ເຮັດແບບດຽວກັນນັ້ນ.
ພະເຈົ້າກຳລັງໃຊ້ຄະນະກຳມະການປົກຄອງເພື່ອເຮັດຕາມໃຈປະສົງຂອງພະອົງ. ພີ່ນ້ອງຊາຍທີ່ຖືກເຈີມເຊິ່ງຮັບໃຊ້ໃນຄະນະກຳມະການປົກຄອງມີຄວາມສົນໃຈຢ່າງຈິງຈັງໃນສິ່ງທີ່ພະເຈົ້າບອກໄວ້ ແລະມີປະສົບການຫຼາຍໃນການຈັດການກັບເລື່ອງຕ່າງ ໆ ທົ່ວໄປແລະຕອບຄຳຖາມກ່ຽວກັບຄວາມເຊື່ອທາງສາສະໜາ. ຄະນະກຳມະການປົກຄອງປະຊຸມກັນທຸກອາທິດເພື່ອພິຈາລະນາເຖິງຄວາມຈຳເປັນຂອງພີ່ນ້ອງຮ່ວມຄວາມເຊື່ອໃນທົ່ວໂລກ. ເຊັ່ນດຽວກັບໃນສະຕະວັດທຳອິດ ມີການສະໜອງຄຳແນະນຳທີ່ອາໄສຄຳພີໄບເບິນເປັນຫຼັກຜ່ານທາງຈົດໝາຍຕ່າງ ໆ ຫຼືທາງຜູ້ດູແລເດີນທາງຫຼືທາງອື່ນ ໆ. ການເຮັດແນວນີ້ເປັນການສົ່ງເສີມຄວາມເປັນອັນໜຶ່ງອັນດຽວກັນໃນດ້ານຄວາມຄິດແລະການກະທຳໃນທ່າມກາງປະຊາຊົນຂອງພະເຈົ້າ. (ກິດຈະການ 16:4, 5) ຄະນະກຳມະການປົກຄອງເບິ່ງແຍງດູແລການກະກຽມຄວາມຮູ້ກ່ຽວກັບພະເຢໂຫວາ ສະໜັບສະໜູນທຸກຄົນຈັດວຽກງານການປະກາດໃຫ້ເປັນວຽກຫຼັກ ແລະເບິ່ງແຍງການແຕ່ງຕັ້ງພີ່ນ້ອງຊາຍໃນການຮັບໜ້າທີ່ຮັບຜິດຊອບ.
ຄະນະກຳມະການປົກຄອງຕອບຮັບການຊີ້ນຳຈາກພະວິນຍານຂອງພະເຈົ້າ. ຄະນະກຳມະການປົກຄອງເພິ່ງການຊີ້ນຳຈາກພະເຢໂຫວາເຊິ່ງເປັນຜູ້ມີສິດທິສູງສຸດໃນການປົກຄອງເອກະພົບ ແລະພະເຍຊູເຊິ່ງເປັນປະມຸກຂອງປະຊາຄົມ. (1 ໂກລິນໂທ 11:3; ເອເຟດ 5:23) ສະມາຊິກຂອງຄະນະກຳມະການປົກຄອງບໍ່ຖືວ່າຕົນເອງເປັນຫົວໜ້າປະຊາຊົນຂອງພະເຈົ້າ. ເຂົາເຈົ້າພ້ອມທັງຄລິດສະຕຽນຜູ້ຖືກເຈີມທັງໝົດຕິດຕາມ “ລູກແກະ [ພະເຍຊູ] ສະເດັດໄປທາງໃດ ຄົນທັງຫຼາຍນີ້ກໍຕາມພະອົງໄປທາງນັ້ນ.” (ຄຳປາກົດ 14:4) ຄະນະກຳມະການປົກຄອງຮູ້ຄຸນຄ່າເມື່ອພວກເຮົາອະທິດຖານສຳລັບເຂົາເຈົ້າແລະວຽກງານຂອງເຂົາເຈົ້າ.
-
ໃນສະຕະວັດທຳອິດ ມີໃຜແດ່ທີ່ຮ່ວມຢູ່ໃນຄະນະກຳມະການປົກຄອງ?
-
ໃນທຸກມື້ນີ້ ຄະນະກຳມະການປົກຄອງສະແຫວງຫາການຊີ້ນຳຈາກພະເຈົ້າແນວໃດ?
