DILONGESHA DIA 20
Kasumbu kaludiki katu kenza malu mushindu kayi lelu?
Kasumbu kaludiki ka mu bidimu lukama bia kumpala
Badi babala mukanda wa kudi kasumbu kaludiki
Mu bidimu lukama bia kumpala, kasumbu kakese ka bantu kenza ne “bapostolo ne bakulu ku Yelushalema” ke kavua kenza kasumbu kaludiki. Bena mu kasumbu aku bavua bangata mapangadika manene bua diakalenga dia tshisumbu tshijima tshia bena Kristo bela manyi. (Bienzedi 15:2) Tshilejilu, pavuabu bangate dipangadika kampanda mu buobumue, bavua bakonkonone tshivua Dîyi dia Nzambi diamba, ne balonde buludiki bua nyuma wa Nzambi. (Bienzedi 15:25) Ke mudi Kasumbu kaludiki ka lelu kenza.
Nzambi udi ukuata mudimu ne Kasumbu kaludiki bua kuenza disua diende. Bana betu ba balume bela manyi badi mu Kasumbu kaludiki badi banemeka Dîyi dia Nzambi bikole ne badi ne dimanya dia bungi mu mushindu wa kulombola mudimu wetu ne malu makuabu adi atangila ntendelelu wetu. Batu badisangisha lumingu luonso bua kuakula malu adi atangila ntendelelu wetu pa buloba bujima. Anu bu mu bidimu lukama bia kumpala, badi bafila mibelu ya mu Bible ku diambuluisha dia mikanda anyi ku butuangaji bua batangidi bena ngendu peshi mu mishindu mikuabu. Dienza nunku didi diambuluisha batendeledi ba Nzambi bua kuela meji mushindu umue ne kuenza malu mushindu umue. (Bienzedi 16:4, 5) Bena mu Kasumbu kaludiki badi baludika dilongolola dia malongesha a mu Bible, bakankamija bantu bonso bua kuteka mudimu wa kuyisha Bukalenge bua Nzambi pa muaba wa kumpala, ne batangila dipesha dia bana betu majitu mu tshisumbu.
Badi balekela nyuma wa Nzambi ubalombola. Bena mu Kasumbu kaludiki badi bakeba buludiki kudi Mfumu Mutambe Bunene wa diulu ne buloba, Yehowa, ne kudi Yezu, udi ku mutu kua tshisumbu. (1 Kolinto 11:3; Efeso 5:23) Bena mu kasumbu aka kabena badiangata bu bamfumu ba batendeledi ba Nzambi to. Bobu ne bena Kristo bela manyi bakuabu bonso “badi batungunuka ne kulonda Muana wa mukoko [Yezu] kuonso kudiye uya.” (Buakabuluibua 14:4) Bena mu Kasumbu kaludiki badi banyisha bikole patudi tusambila bua bualu buabu ne bua mudimu udibu benza.
-
Bavua mu kasumbu kaludiki ka mu bidimu lukama bia kumpala mbanganyi?
-
Mmunyi mudi bena mu Kasumbu kaludiki ka lelu bakeba buludiki bua Nzambi?
Mona bikuabu:
NKONKO ITU BANTU BATAMBA KUELA
Udi muenze tshitendelelu tshia Bantemu ba Yehowa nnganyi?
Manya bua tshinyi Charles Taze Russell ki ngudi muenze tshitendelelu tshipiatshipia atshi to.
NKONKO ITU BANTU BATAMBA KUELA
Kasumbu kaludiki ka Bantemu ba Yehowa ntshinyi?
Bena mu Kasumbu kaludiki mbamfumu ba bulongolodi buetu anyi?
