Ilo kar iien ko etto, “rijjelõk ro im ri tõl ro an eklejia eo ilo Jerusalem” rar lale aolep eklejia ko ilo tõre ko. Kumi jidikdik in ear kõm̦m̦ani pepe ko raorõk ilo etan aolep eklejia ko an Kũrjin ro ilo iien ko etto. (Jerbal 15:2, UBS) Em̦m̦aan rein rar kõjerbale Jeje ko Rekwõjarjar im rar kõtl̦o̦k bwe kajoor eo an Anij en tõl er ñe rej kõm̦m̦ane juon pepe. Ilo wãween in, aoleper rej errã im m̦õn̦õn̦õ kake pepe eo. (Jerbal 15:25) Ilo raan kein, kumi eo me ej lale aolep eklejia ko an Ri Kõnnaan ro an Jeova rej kõm̦m̦ane ejja wãween in wõt.

Anij ej kõjerbale kumi in ñan kajejjet ankilaan. Aolep em̦m̦aan ro me rej pãd ilo Kumi eo Ej Lale Aolep Eklejia ko an Ri Kõnnaan ro an Jeova rej ri kabit. El̦ap an em̦m̦aan rein kaorõk Naan in Anij. El̦ap aer imminene in kõm̦m̦ani pepe ko ikijjeen aolep jerbal ko amim im rejel̦ã kilen uwaaki kajjitõk ko jãn Baibõl̦ eo. Kajjojo wiik, rej kweilo̦k ippãn doon bwe ren jel̦ã kilen jipañe ri tõmak ro m̦õttaer ipel̦aakin lal̦ in. Ãinwõt kar iien ko etto, em̦m̦aan rein rej letok naan in tõl ko jãn Baibõl̦ eo ñan kõj. Ewi wãween? Eokwe, rej jilkintok lõta ko ak em̦m̦aan ro ñan lotok eklejia ko kajjojo im bar wãween ko jet. Ilo wãween in, men in ej jipañ armej ro an Anij bwe ren l̦õmn̦ak im jerbal ilo juon wãween ebõrokuk. (Jerbal 16:4, 5) Kumi in me ej lale aolep eklejia ko ipel̦aakin lal̦ in rej loloorjake aolep katak ko me jej bõki. Rej rõjañ aolep ri kwal̦o̦k naan ro bwe ren kaorõk jerbal in kwal̦o̦k naan kõn Aelõñ eo an Anij el̦apl̦o̦k jãn jerbal ko jet. Rej tõl im loloorjake jerbal ko ñan kããlõt em̦m̦aan ro me remaroñ bõk eddo ko rel̦l̦ap ilo doulul in.

Kumi in ej l̦oore tõl eo an kajoor eo an Anij. Em̦m̦aan ro ilo kumi eo me ej lale aolep eklejia ko an Ri Kõnnaan ro an Jeova rej kõttãik er make ñan Jeova, eo Ekajoor Bõtata. Rej bareinwõt kõttãik er make ñan Jesus, eo ej Bõran eklejia otemjej. (1 Korint 11:3; Epesõs 5:23) Em̦m̦aan rein rejjab watõk er ãinwõt ri tõl ñan armej ro an Anij. Em̦m̦aan rein im aolep ri kapit ro jet “rej l̦oor L̦aam̦ eo [Jesus] ijo jabdewõt Ej etal ie.” (Revelesõn 14:4) Kumi in me ej lale kõj el̦ap aer m̦õn̦õn̦õ ñe jej jar kõn er im kõn aolep jerbal ko rej kõm̦m̦ani.

• Wõn ro rar lale aolep eklejia ko an Kũrjin ro ilo iien ko etto?

• Ewi wãween an kumi eo me ej lale aolep eklejia ko rainin kõtl̦o̦k bwe Anij en tõl er?