Икымше курымысо вуйлатыше советыш Иерусалимысе «Апостол ден пресвитер-влак [кугурак иза-влак, УТ]» пуреныт. Нине иза чыла шӱрымӧ христиан дене кылдалтше да кугу значениян пунчал-влакым луктыныт (Апост. пашашт 15:2). Пунчалым лукмышт деч ончыч нуно, Возымаште ойлымым шотыш налын, каҥашеныт да вара Юмын шӱлыш вӱдымыжӧ почеш ыштеныт (Апост. пашашт 15:25). Тачысе Иегован Таныкше-влак тыгак ыштат.

Юмо тудым шке эрыкшым шукташлан кучылтеш. Вуйлатыше советыште служышо шӱрымӧ иза-влак Юмын Мутшым пеш чот аклат. Илыш да Юмын пашаж дене кылдалтше йодыш-влак шотышто нунын кугу опытышт уло. Нуно уло тӱнямбалне илыше иза-шольо-влакын кӱлешлыкыштым каҥашаш манын, кажне арнян погынат. Икымше курымысо погынымашын примерже почеш нине иза Библий дене келшыше каҥашым тӱрлӧ семын пуат: серыш гоч, районым эскерыше иза але вес иза-влак гоч. Тидлан кӧра Юмын калык коклаште чыланат ик семын шонат да ик семын ыштат (Апост. пашашт 16:4, 5). Вуйлатыше совет ответственный пашам шукташ иза-влакым шогалта, Библий негызеш возымо публикаций-влакым ямдылыме верч мутым куча, тыгак Кугыжаныш нерген таныклыме паша шарлыже манын тырша.

Юмын шӱлыш вӱдымыжӧ почеш ышта. Вуйлатыше совет чыла шотыштат Эн Кӱшылсӧ Юмым, Иеговам, да Погынымашын вуйжым, Иисусым, колыштеш (1 Коринфян-влаклан 11:3; Ефесян-влаклан 5:23). Нине иза-влак Юмын калык коклаште шкеныштым вуйлатыше семын огыт кучо. Нуно моло шӱрымӧ христиан-влак дене пырля «Пача [Иисус] кушко кая, почешыже мият» (Почмаш 14:4). Вуйлатыше совет гыч иза-влак нунын верч кумалмынам пешак аклат.

• Икымше курымын вуйлатыше советыш кӧ пурен?

• Тачысе Вуйлатыше совет Юмын кумылжым кузе шотыш налеш?